رِسَّةْ شِيَمْ
شَوْفِكْ مِثِلْ غَيْثٍ عَلَى صَدْر مَهْجُوْر
جَوْفه حِيَى بِكْ وِاحْتِضَنْ كِلّ نَفِّهْ
سَيَّلْت بِهْ شَوْقْ وْأحَاسِيْس وِ شْعُوْر
حَتَّى انْتِشَتْ لِكْ دَاخِلْ الرُّوْح ضِفِّهْ
خَلِّكْ لِوَنَّاتْ الْمَعَالِيْق مَذْخُوْر
دَامِكْ بِكِفِّهْ وِالْخَلايِقْ بِكِفِّهْ
عِطَيْتِنِيْ حِبِّكْ مِنْ الْقَلْب.. مَشْكُوْر
كِلِّكْ مِشَاعِرْ وِاحْتِرَامٍ وْ عِفِّهْ
وِانْصَاعْ لِكْ قَلْبٍ بِغِرِّتْك مَجْبُوْر
لَفّهْ غَرَامِكْ مِنْ أمَامِهْ وْخَلْفِهْ
لاَ تِشْعِلْ سْرَاجِكْ وْ لاَ تْزِيْدِنِي نُوْر
إسْدِلْ حِرِيْر الشَّعْر فَوْقه.. وْ طَفّهْ
أخَافِنِيْ أصْبِحْ مِنْ النُّوْر مَغْرُوْر
وِيْضِمِّنِيْ دِرْج الْغِرُوْر وْمَلَفِّهْ
خَلْنِيْ عَلَى دِنْيَا بِهَا عِشْت.. مَسْرُوْر
والطِّيْب مِنْ وَجْه الْكِرِيْم أسْتِشِفِّهْ
إنْ بَارْ حَظِّيْ قِلْت: يَا حَظّ مَاجُوْر
وِانْ جَادْ حَظِّيْ بِالرِّكَادِهْ أزِفِّهْ
مِنْ رِسَّةْ الشِّيْمَاتْ لِيْ حَالْ مَسْتُوْر
وْلاَ خَابْ مِنْ سَاقْ الْمَعَانِيْ لِصَفّهْ