شعر: عيون المها

سَجَّةْ فِكِرْ

الْيَوْم ... ضَاقْ (الْعَارِضْ) بْكِلّ مَا فِيْه

                مِنْ ضِيْقِةٍ مَرَّتْ عَلَيْ وِ رْثَعَتْ بِيْ

سَجَّيْت ... فِيْ بَحْر التِّفَاكِيْر وِ التّيْه

                وَ اخَذْت لِيْ جَوْلِهْ بَعَدْ مَا اسْهِبَتْ بِيْ

ذِكْرَى تِجِيْبِهْ لِيْ وْ ذِكْرَى تِوَدِّيْه

                وْ ذِكْرَى تِمَوِّتْنِيْ وْ ذِكْرَى حِيَتْ بِيْ

اللّه حِسِيْب الْوَقْت لا جَابْ طَارِيْه

                مَا كَنِّهْ إلاَّ خَنْجَرٍ وِ انْثِبَتْ بِيْ

وِ الاَّ مِثِلْ سَيْلٍ تَحَدَّرْ بِوَادِيْه

               مَرّ وْ خَذْ غْصُوْن الْحِيَا اللَّى بِقَتْ بِيْ

لا وَاللّه إلاَّ رِيْح ... وَاتْلَتْ بِتَالِيْه

               يَا قُوَّةْ اللّه وِشْ بِقَى وِشْ لِقَتْ بِي..؟!

مَا يِنْشِكَى جَرْح النِّدَامِهْ لِرَاعِيْه

             سَحَّابِةٍ خَالَتْ عَلَيْ وِ امْطَرَتْ بِيْ

لَيْت السِّنِهْ تَمَّتْ ... وْ قَفَّتْ .. تِبَارِيْه

             أقَلَّهَا اقُوْل السِّنِهْ مَا ارْخِصَتْ بِيْ

عَشَانْ مَا الْحِقْهَا مَلامْ وْ مِشَارِيْه

            وَ اقُوْل كَثَّرْ خَيْرَهَا تْجَمِّلَتْ بِيْ

وِ الاَّ مِوَاجِعْ جَرْحه وْ ذِكْر مَاضِيْه

           تَبْطِيْ تِشِيْل رْسُوْمَهَا اللَّى وْسِمَتْ بِيْ

وَ اللّه .. فَلا ابْكِيْ وَ اسْهِرْ الْعَيْن وَ ارْجِيْه

         رُوْحِيْ وَ اعَرْف عْلاجْهَا لا جْمَحَتْ بِيْ

طباعة Email
تعليقات

تعليقات