شعر: عبدالله صالح العمري
هديَّةْ أحْبَابْ
يا قَلْبي اللَّى يحبِّك صِدق وِيْصُوْنِكْ
يَرْخِصْ على شانك الدِّنْيَا وما فِيْهَا
ما يسمع الواشي النمَّامْ وِيْخونك
حَتَّى ولو نفترض.. زَلَّيْت يَمْحِيْهَا
نَاهِيْك.. عَنْ كَوْنِكْ مْغَطِّيْه بِعْيونك
حَتَّى من الدَّمْع صِنْته عن مجاريها
تسهر بهمّه وهو نايم بمكنونك
وِجْروح ماضيه باحساسك تداويها
واليوم هذا الجزا.. غَرْقَانْ بِطْعونك
هَديَّة أحْبَابْ حادت عن مباديها
وانته إلى اليوم فيهم تحسن ظْنونك
وِتْدَوِّرْ أعْذار لِجْروحك تواسيها
وين الِّذي قال بانّهْ بيتك وْكَوْنِكْ
وانِّهْ على العهد لو زالت رواسيها
هَزَّتْه رِيْح الظِّنُوْن وْزَلْزَلْ حْصُوْنِكْ
والعِشْره سْنِيْن ما واللّه افْتِكَرْ فِيْهَا
يا دوب كَذبه.. سمَعْ من ناس يشنونك
وَارَادْ يقْلِبْ على عاليك واطيها
من غير ذَرَّةْ ضمير تْكون في عونك
كَنِّهْ مبَيِّتْ لك النِّيّه وناويها
ناسي وفاك وغلاك وبارد مْزونك
وِمْروِّتِكْ يوم زَلاَّته تداريها
لا باس خَلِّهْ يروح يْعِيْش من دونك
وْقِلْ حَسْبي اللّه بَاوَّلْها وْتاليها
وِاحْفَظْ مباديك وِتْرَقَّبْ على هونك
تشوف الايَّامْ تكْشِفْ عن خوافيها
وما دام رَبِّي خذَلْ من هُمْ يكيدونك
(والنَّارْ ما تحرِقْ إلاَّ رِجِلْ وَاطِيْهَا)
لا شِفْت طيفه رجَعْ يِتْوَدَّدْ جْفونك
قِلْ لِهْ سلامات.. كَم حِفْره وقَعْ فِيْهَا..؟!
