إكسبو 2020

(إكْسِبُوْ عِشْرِيْن) فَازَتْ بِهْ (دبَيّ)

وْصَارَتْ الْفَرْحه بداري فَرْحِتَيْن

إفْرِحِيْ يَا دَوْلَةْ الْمَجْد الأبِيّ

وِاكْسِريْ بَامْجَادِكْ أنْف الْحَاسِدِيْن

وْ عَ جِبَاهْ الْعِز يَا بْلادي إكْتِبِيْ

(رَقَمْ وَاحِدْ) وِالشَّعِبْ مِتْوَحِّدِيْن

حَاسِدِكْ مَا نَالْ مِنِّكْ مَا يَبِيْ

فَوْق هَامْ السِّحْب مَرْفوْعَةْ جِبِيْن

ما يلومك غَيْر حَاسِدْ أوْ غَبِيْ

إبْتَلَى بِكْ يَوْم شَافِكْ تَطْمِحِيْن

ما ينال الْمَجْد مَنْ يَحْبُوْ حَبِيْ

عِمْرَهَا الأمْجَادْ مَا جَتْ نَايِمِيْن

مَا نِطِيْح وْعَاصِمَتْنَا (بُوْظَبِيْ)

وِالرِّسَنْ بِيْدَيْن قَايِدْنَا الْفِطِيْن

وْمِنْ حَلاهَا (دْبَيّ) تَسْبِيْنَا سَبِيْ

كِلّ مَا فِيْهَا يِشُوْق الزَّايِرِيْن

مِنْ مَحَاسِنْهَا تَرَى يْغَارْ الظَّبِيْ

جَوْهَره هِيْ كِلّ مَا تِكْبَرْ تِزِيْن..!

تَبْهِرْ أنْظَارْ الْعَرَبْ وِالأجْنَبِيْ

فِتْنة ٍ تَسْلِبْ قِلُوْب الْعَاشِقِيْن

وِجْهَةْ الْعَالَمْ غِدَتْ وَالله (دبَيّ)

وْصَارَتْ الْفَرْحه بداري فَرْحِتَيْن

وْقَالْ (بُوْ رَاشِدْ) تَحَقَّقْ مَطْلِبِيْ

نِحِنْ (أسْعَدْ شَعْب) وِالْفَرْحه تِبِيْن

تابعوا فكر وفن من البيان عبر غوغل نيوز