سَاكِنْ القِمِّهْ

إكْتِبْ عَلَى صَدْر الْبَحَرْ مَا حَلا لِكْ

دَوِّنْ وْكِلّ الشَّعْب (بُوْ رَاشِدْ) وْيَاكْ

نْعَانِقْ شْمُوْخ الْفَخَرْ مِنْ خِلالِكْ

نُوْصَلْ لِغَايَتْنَا عَلَى مِنْهَجْ خْطَاكْ

مَا بِهْ مَحَال ٍ سَيِّدِيْ فِيْ خَيَالِكْ

الرَّكِبْ يَمْشِيْ وِالتَّحَدِّيْ سِجَايَاكْ

شَامِخْ عِزِيْمَتْنَا صَخَرْ ما تَهَالَكْ

(مِنْ قِمِّه لْقِمِّهْ) عَلَى حِسّ وِادْرَاكْ

لَبَّيْك يَا مَنْ دَاعِيْ الْمَجْد فَالِكْ

يَا مَنْ شِمُوْخ الْمَجْد يَسْكِنْ مِحَيَّاكْ

مَا هَانْ عَزْمِكْ لا ولا ارْتَاحْ بَالِكْ

إلاَّ عَلَى الرَّقْم الْمِفَضَّلْ لِمَبْدَاكْ

(الرَّقَمْ وَاحِدْ) يِنْتِمِيْ وانْتِمَى لِكْ

وَافَقْ طموحاتك وْأيْقَنْ لِمَسْعَاكْ

مَا فِيْه شَكّ انِّكْ لِلِقْلُوْب مَالِكْ

يا سَاكِنْ الْقِمِّهْ وْمِتْرَبِّعْ هْنَاكْ

كَمٍ وْكَمّ وْكَمّ مِعْسِرْ دَعَا لِكْ

فِيْ ثِلْث لَيْلِهْ طَالِبْ الرَّبّ يِحْمَاكْ

حَقَّقْت يَا (مْحَمَّدْ) بَعَضْ مَا بِدَا لِكْ

تَارِيْخ يَكْتِبْ وِالزِّمَنْ مَا تِنَاسَاكْ