الْوَتَرْ السَّابِعْ

خَذْك الزِّمَنْ وَاقْفَى بِكْ

              وِيَّا الْحَظّ الْعَثِرْ

وَيْنِكْ وْ وَيْن تْرَابِكْ..؟!

              لا حِسّ وْ لا أثَرْ

الشَّوْق لَى مَا يَابِكْ

              عَلَّمْ عَيْنِيْ السَّهَرْ

صَوْت الْوَلَهْ غَنَّى بِكْ

              عَلَى سَابِعْ وِتَرْ

مِثْل الْمِطَرْ نِحْيَا بِكْ

              شَوْفِكْ يَجْلِيْ الْكِدَرْ

سِوَالْفِيْ تِزْهَا بِكْ

              وَرْد وْ عُوْد وْ عِطِرْ

مَا اقْدَرْ أعِدّ غْيَابِكْ

              مَلَّيْت مْن الصَّبِرْ

لَيْتِكْ تِزُوْر أحْبَابِكْ

              وِشْ بَاقِيْ مْن الْعِمِرْ..؟!