شعر: تركي بن مطر
هَاللَّيْل هَاتِيْ بَعْضِكْ اللَّى عَنْ الكِلّ
قَبْل السِّمَا تِلْبَسْ مِنْ النُّوْر حِلِّهْ
حَبِيْبَتِيْ: قَلْبِيْ مِنْ فْرَاقْنَا مَلّ
وِشْ رَايِكْ آشِيْلِهْ وَاحِطِّكْ مَحَلِّهْ..؟!
تَرَى الْوِدَاعْ يْضَيِّقْ الصَّدِرْ وِيْعِلّ
شُوْفِيْ حِرُوْفَهْ نِصَّهَا حْرُوْف عِلِّهْ
مَا عَادْ لِيْ حِيْلِهْ وْ لا عَادْ لِيْ حَلّ
فِيْ يَدْك قَلْبِيْ وِالْعِمِرْ فِيْ يَدْ اللّه
مَا الُوْم عَيْنٍ لا تِذَكَّرْتِكْ تْهِلّ
دَامْ الْفَرَحْ فِيْ غَيْبِتِكْ صَارْ زَلِّهْ
فِيْ الذَّاكِرِهْ لِكْ ذِكْرٍ يْزُوْد مَا قَلّ
نِسْيَانِيْ الْيَا حَاوَطَهْ.. قِلْت: خَلِّهْ
يَا وَجْهٍ آحِبِّهْ وَاشُوْفَهْ إذَا طَلّ
يَشْرِقْ مِثِلْ شَمْس الصِّبَاحْ الْمِطِلِّهْ
إذَا إلْتِفَتِّيْ فِيْنِيْ يْصِيْر لِيْ ظِلّ
وِاذَا ابْتِسَمْتِيْ رَحْت أدَوِّرْ مِظَلِّهْ..!
يَا غَالِيِهْ لَيْت الْغَلا يِنْقِلِبْ غِلّ
مَجْرُوْح جَرْحٍ يَكْفِيْ الْعِمِرْ كِلِّهْ
أثْر الْوِدَاعْ يْضَيِّقْ الصَّدِرْ وِيْعِلّ
حَتَّى حِرُوْفَهْ نِصَّهَا حْرُوْف عِلِّهْ