سَامِرِيَّةْ وَهَمْ

سَافِرِيْ لا يِهِمِّكْ.. واسْمِحِيْ لا قِسَيْت

دِيْرِتِيْ جَرْح.. وِحْدُوْدِيْ دِمُوْع وْأَلَمْ

صُوْرِتِكْ فِيْ خَيَالِيْ.. بَاقِيِهْ مَا بِقَيْت

كِلّ مَا فَزّ جَرْح وْ كِلّ مَا فَزّ هَمّ

أعْتِرِفْ فِيْ غَرَامِكْ ذِبْت لَيْن ابْتِلَيْت

وْمِنْ تَعَرَّضْ لِصَكَّاتْ الْهُوَى مَا سَلَمْ

مِنْ يِصَدِّقْ أحِسّ خْطَاكْ لا مِنْ خِطَيْت

فِيْ عِرُوْقِيْ.. وَاحِسّ بْهَمْس وَقْع الْقِدَمْ

قِلْت مَرَّهْ نِسِيْتِكْ وَاعْتِرِفْ مَا نِسَيْت

لَوْ كِذَبْت وْنِسَيْتِكْ مَا كِذَبْ هَالْقَلَمْ

أظْلِمِكْ وَانْظِلِمْ.. تَبْكِيْ.. وْيَامَا بِكَيْت

وِدِّيْ آمُوْت وَاعْرِفْْ بَسّ مِنْ هُوْ انْظَلَمْ

عِشْت فَرْحِكْ وْجَرْحِكْ بِالْأَسَى مَا شِكَيْت

عِشْت قِصَّةْ غَرَامْ بْسَامْرِيَّةْ وَهَمْ

مِنْ هُوْ اللَّى بِنَى مِنْ جَرْح الايَّامْ بَيْت

مِنْ بِنَى مِنْ جِرُوْح الْوَقْت بَيْت انْهِدَمْ

سَافِرِيْ لا يِهِمِّكْ.. وِاسْمِحِيْ لا قِسَيْت

وِابْشِرِيْ بِيْ جِرَاحَاتْ وْدِمُوْع وْأَلَمْ