سِيْرَةْ كِفَاحْ

عِشْنَا صِرَاعْ الْبَحَرْ.. نِدَّيْن

وَقْت الشِّقَا وْ سَالِفْ أزْمَانِهْ

 

نَعْلُوْ عَلَى الْمَوْج بُوْ رَضْفَيْن

وْ نَفْلِقْ عَلَى صَدْرِهْ الدَّانِهْ

 

وِالْبَرّ سِيْرَةْ كِفَاحْ سْنِيْن

وِاحْنَا هَلِهْ وْ نِسْمَةْ أحْضَانِهْ

 

يَامَا سِرَيْنَاهْ فَوْق الْهِيْن

وِدْرُوْبِنَا نْجُوْم سَهْرَانِهْ

 

وِالْعَامْ وَاحِدْ بَعَدْ سَبْعِيْن

فِيْ الرُّوْح تِتْرَنَّمْ ألْحَانِهْ

 

يَـــــوْم اتَّحَدْنَا عَلَى قَلْبَيْن

(زَايِدْ) وْ (رَاشِدْ) مَعْ اخْوَانِهْ

 

مَوْلِدْ وَطَنْ مِذْهِلْ التَّكْوِيْن

فِيْ الْيَمّ وِالْبِيْد مِرْجَانِهْ..!

 

وَاهْل (الإمَارَاتْ) نَهْج وْ دِيْن

تِفْدَاهْ وِتْهِيْن عِدْوَانِهْ