اللَّوْحَةْ البديعه

غَيَّمْ وْدَيَّمْ.. بَشَّرْ بْخَيْر

السِّحِبْ تَرْعِدْ وِالْمِطَرْ طَاحْ

مِالْفَرْحه نْسُوْق التِّبَاشِيْر

دَامِهْ يِغِيْث قْلُوْب وَارْوَاحْ

وِالدَّارْ مَعْ رِيْح الْمِطَرْ غَيْر

لَوْحه بِدِيْعِهْ عِطْرَهَا فَاحْ

وْفَاعْ النِّسِيْم وْ غَرَّدْ الطَّيْر

وِ اسْتَبْشَرْ فْوَادِيْ بِالافْرَاحْ

يَا غَيْر مَرّ مْخَالِفْ السَّيْر

اللَّى يِذَكِّرْنِيْ بِمَا رَاحْ

هَاجِسْ يِوَرِّدْنِيْ التِّفَاكِيْر

وَادْعَى سِعِيْد الْقَلْب فَــ.. اتْرَاحْ

يْبِثّ حِزْنِهْ حَزَّةْ عْصَيْر

اللَّى عَلَى الضِّيْقَاتْ مِفْتَاحْ

وِ تْوَالِفَوْا حَوْلِيْ مِسَايِيْر

هَمّ وْحَنِيْن وْسَبْعَةْ جْرَاحْ

عَلَى فِرِيْقٍ كَانَوْا بْخَيْر

فِــ.. مْوَاصَلْ وْجَمْعَاتْ وِ مْزَاحْ

وِتْغَيِّرَوْا مِنْ دُوْن تَفْسِيْر..!

بِالْوَصل مَعْ طُوْل الْبِطَى شْحَاحْ

وَاللّه مَا نَبْغِيْ مَعَاذِيْر

غَيْر الْوَصِلْ بِهْ خَيْر وَارْبَاحْ

حَالْ الْحِبَايِبْ وَيْن بَيْصِيْر..؟

عَلَى الْوَضِعْ مَانَا بْمِرْتَاحْ

أحْيَانْ رَاضِيْ بِالْمِقَادِيْر

وَ احْيَانْ وِدِّيْ عِنْدِيْ جْنَاحْ

لَى ضَاقْ صَدْرِيْ فِيْ السِّمَا آطِيْر

بَيْن السِّمَا وِالأرْض سَوَّاحْ