وِشْلَوْن ألُوْم التَّعَبْ لا مِنْ قِفَاهْ نْعَاسْ..؟
وَ انَا ظِلالٍ.. يَبِيْ يَكْسِبْ رِضَا شَمْسِهْ
وْ وِشْلَوْن أبَنْأَى بِذَاكِرْتِيْ عَنْ الْهُوْجَاسْ..؟
وْ خَيْبَاتْ قَلْبِيْ تِرِدّ الْيَوْم يَمّ امْسِهْ..!
عِطَيْت صَبْرِيْ مِنْ الْكِلْمَاتْ كِلْمَةْ: بَاسْ
وَ اخَذْت صَوْتٍ تَعَثَّرْ فِيْ صِدَى هَمْسِهْ
مَا عَادْ أبِيْ مِنْ شِقَايْ اللَّى مِضَى نِسْنَاسْ
وِ الرِّيْح فِــــــــــــــ.. مْرَايَةْ اللَّى جَايْ مِنْعَكْسِهْ
يِجْرَحْنِيْ اللَّى يِقُوْل انِّيْ مَعَهْ حَسَّاسْ
وِ اللَّى يِقُوْل إنْ جِفَاكْ اللَّى تِحِبّ: إنْسِهْ..!
فِيْ وِحْدِتِيْ بَعْثَرَةْ رَاحه وْ لَمَّةْ يَاسْ ..!
وَ اوْجَاعْ لاقَى الزِّمَنْ فِيْ حَدْسَهَا.. حَدْسِهْ
مَشَّيْت قَلْبِيْ عَلَى دَرْب السِّمَاحْ.. وْ دَاسْ
شَيٍ تَخَافْ الْقِلُوْب الْقَاسيه لَمْسِهْ
وْ عَلَيّ بَدَّيْت كِلّ النَّاسْ.. لَوّ النَّاسْ
مَا فِيْهُمْ اللَّى.. يِبَدِّيْنِيْ عَلَى نَفْسِهْ