00
إكسبو 2020 دبي اليوم

شعر: أسما البراهيم

الْجَمْع والطَّرْح

ت + ت - الحجم الطبيعي

رَوَّضْت هَمٍ أوْهَنْ الْقَلْب وَ اوْجَعِهْ

                     صِغْتِهْ قِصِيْدٍ عَانَدْ الْفِكر مَطْلَعِهْ

عَلِّهْ يِخِفّ الْحِمل وِ يْزِيْن خَاطِرِيْ

                     وِ الْهَمّ يِلْقَى بَيْن الابْيَاتْ مَصْرعه

لا وِصْلَتْ اللَّى لِهْ نِصِيْبٍ مِنْ الْغَلا

                     وَ اصْغَى قَبِلْ لا كَفّ الايَّامْ تِصْفَعه

مِنْ لِهْ حِفَظْنَا الْوِدّ بِالسِّرّ وِ الْعَلَنْ

                     لا هُوْ طِمَعْ وِ الاّ نَبِيْ مِنْه مَنْفَعه

يَوْم انِّهْ أبْدَى الصَّدّ مِنْ دُوْنِمَا سِبَبْ

                     عَسَاهْ خَيْر اللَّى عَنْ الْوَصل يِمْنَعه

مَا دَامْ سَالِمْ وَ ادْرِيْ انِّيْ عَلَى الْعَهَدْ

                     وْ لا جَاهْ مِنِّيْ مَا يِضِرِّهْ وْ يَفْجِعه

بَاصْبِرْ وَ اطَمِّنْ خَوْف قَلْبِيْ وَ ابَنْتِظِرْ

                     لَوْ انِّيْ أدْرِيْ لِلْقِسَا وَيْش يِدْفَعه

بَلاهْ مِنْ غَالِيْ يِصَدِّقْه لا اشْتِكَى

                     وِ انْ مَا لِقَى دَافِعْ لِشَكْوَاهْ يِصْنَعه..!

كِثِيْر هَرْج وْ لَوْم يَسْبِقْ لْيَا ضَرَبْ

                     وِ الْيَا بِكَى يِرْحَمْه ، وِ انْ قَالْ يِسْمَعه

يِظِنّ كِلّ النَّاسْ ضِدِّهْ وْ تَخْذِلِهْ

                     لِهْ يَلْبِسُوْن بْكِلّ الاحْوَالْ أقْنِعِهْ

سَاخِطْ فَلا يِرْضَى وْ لَوْ حَاشْ مَا بَغَى

                     وَ ادْنَاةْ مَا يِطْرَا عَلَى الْحَالْ يَجْزعِهْ

أفْنَى تِمَنِّيْ مَا مَعْ الْغَيْر بَهْجِتِهْ

                     وْ مِنْ لا شِكَرْ رَبِّيْ عَلَى الْخَيْر ، يَنْزِعه

يَا لِلأسَفْ هذَاكْ مِنْ ذَا الْيَا هَرَجْ

                     يِسْمَعْ وْ ثَوْب حْكَاهْ لا انْشَقّ يِرْقَعه

هذَا وْهُوْ يَدْرِيْ بِهْ إنْ قَالْ لَوْ صِدَقْ

                     هَوَّلْ .. وْ أحْيَانْ بْتِظَلّمْه يِخْدَعه

كَيْف آتجَرَّا وْ آتِشَرّهْ وَ اعَاتبه

                     وْ حَبْلِيْ لَوْ يْعَارِضْ هِوَى (ذَاكْ) يِقْطَعه

إن كَانْ ذِيْ حَالِهْ وْ ذَا حَالْ وَصْلِنَا

                     مَا لِيْ سِوَى اطْرَحْ حَاصِلْ الْوِدّ وَ اجْمَعه

ثُمّ احْسِبْ اللَّى بَاقِيٍ مِنْ كَرَامِتِيْ

                     وِشْ قَدْرَهَا دُوْنِهْ وْ وِشْ قَدْرَهَا مَعِهْ

وَ انَا اوْعِدِكْ يَا قَلْب لَوْ عَاوَدْ الْجِفَا

                     وَ ابْحَرْ .. مِنْ السِّلْوَانْ بَانْسِجْ لِهْ أشْرِعه

وِ انْ طَيّحه مِنْ عَيْن الاِجْلالْ صَاحِبِهْ

                     بِاسْم الْغَلا يَا عَيْنِيْ أوْعِدْك مَا ارْفَعه

طباعة Email