00
إكسبو 2020 دبي اليوم

شعر: فاطمة ناصر

الأحْلامْ والآجَالْ

ت + ت - الحجم الطبيعي

إنْ حَانْ وَقْت الرَّحِيْل وْ دَقَّتْ السَّاعه

                     (يَا اللّه بْذِكْرٍ جِمِيْل وْ يَا اللّه الْجَنّهْ)

الْعِمر فِيْ بَحر وَقْتِهْ يَطْوِيْ شْرَاعه

                     وِ النَّاسْ مِنْ خَلْف بَرْق الْحِلْم مِنْجَنّهْ

أحْدٍ عَلَى نَفْعِتِهْ مَا يَقْصِرْ ذْرَاعه

                     وَاحْدٍ عَلَى غَفْلِتِهْ يَامَا ضَحَكْ سِنّهْ

لا شَانْ وَجْه الزِّمَانْ وْ كِثْرَتْ أوْجَاعه

                     يَا اللّه لِكْ الْمِشْتِكَى وِ الْفَضل وِ الْمِنّهْ

فِيْ جَوْف صَدْرٍ عَلَيْه الْعَيْن مِلْتَاعه

                     تِسْهَرْ.. وْ مِنْهَا السَّهَرْ فِيْ خَاطِرِيْ كَنّهْ

جَمْرَةْ غِضَى مِنْ هِبُوْب الشّبْط وَلاَّعه

                     يْشِبَّهَا الْحِزن بَيْن الضِّيْق وِ الْوَنّهْ

الْعِمر لَوْ رَاحْ مِنْ صَيْفِهْ وْ مِرْبَاعه

                     يَا رَبّ عِنْدِكْ عَسَى مَا يِخْتِلِفْ ظَنّهْ

الْخَوْف مَعْ خَشْيِتِكْ وِ السَّمْع وِ الطَّاعه

                     تَعْصِفْ بِقَلْبٍ لِفَضْلِكْ دِيْنِهْ يْعِنّهْ

يَا كِثر الاحْلامْ وِ الآجَالْ قَطَّاعه

                     وْ دَرْب الْمَنَايَا طِوَاهَا طَوْيَةْ (الشَّنّهْ)

يَامَا غِفَلْنَا وْ كَنّ الْقَلْب مَا رَاعه

                     فَقْد الْحِبَايِبْ وَ احَاسِيْسٍ لَهَا حَنّهْ

إنسَانْ فِيْه الشِّعُوْر اللَّى وَرَا اضْلاعه

                     بَيْن التَّنَاقِضْ شِعُوْره مَا دَرَى عَنّهْ

لكِنْ إذَا شَافْ مِنْ دِنْيَاهْ مَا لاعه

                     يِرْجَعْ لِضَعْفه وْ حَوْله مَا هُوْ بْمِنّهْ

يَا رَبّ خِذْنِيْ مِنْ الْخِسْرَانْ وَ اوْجَاعه

                     لِلْمَغْفِره وِ الرِّضَا وِ الْعَفو وِ الْجَنّهْ

طباعة Email