شعر: عبدالرحمن السمين

رِزِيْم السِّنِين

عَلَى ضِفَافْ الْعِمر مَا عَادْ مَرَّيْت

                  بِالصَّوْت وِالصُّوْره اللَّى عِشْت فِيْهَا

كَنِّكْ بَعَدْ مَا طِوَاكْ الصَّمْت عَدَّيْت

                  فِيْ قِمِّةٍ مَا تِجِيْك وْ لا تِجِيْهَا

نِسْنَاسْ صَيْفٍ خَذَا وَجْهِكْ وْلَدَّيْت

                  لِلْغَيْمِهْ اللَّى رِسَمْت اسْمِكْ عَلَيْهَا

خَايِفْ تِجِيْبِكْ عَلَى الطَّارِيْ وْصَدَّيْت

                  صِدْفِهْ.. وْ طَافَتْ عَلَى مِنْ يِحْتِرِيْهَا..!

لَيْتِكْ عِبَرْت الزِّمَانْ بْدُوْن تَوْقِيْت

                  وِ الاَّ تَرَكْت الدِّرُوْب لْسَالِكِيْهَا

غِرِيْب كَمْ رِحْت فِيْ الدَّمْعه وْ لا جِيْت

                  غُرْبَةْ يِتِيْمِهْ تَحَرَّى وَالِدَيْهَا

تِسْمَعْ رِزِيْم السِّنِيْن وْ غِبْت وَابْطَيْت

                  سَرَابْ يِنْطَحْ سِمَاكْ وْيِقْتِفِيْهَا

ضِيْق الْحَنِيْن الْقِدِيْم وْسَالْفَةْ لَيْت

                  وَاللّه مَا ابِيْهَا لَوّ غَيْرِيْ يَبِيْهَا

سَجَّيْت عَنْهَا وَانَا لا ضِقْت سَجَّيْت

                  لا بِعْتَهَا لَيْه أعَوِّدْ وَاشْتِرِيْهَا

طباعة Email
تعليقات

تعليقات