ما بين زفرات الوجَع والتأوّه

أصبَحْت مِعْطى في حياتي وْمَحْروم

الله عطاني صَبْر وِعْزوم قوّه

أحتاج لكنّي من الشِّيمه آشوم

تعَبْت أجَمِّل وَجْه حَظٍ مشَوَّه

ما عاد له شَرْهَه ولا عاد لي لوم

اللي تنكَّر للوفا والأخوّه

لا يحْسب إنّي من سواياه مَصْدوم

كم واحدٍ من ضَوّي يْشِبّ ضَوّه

والحرّ ما يَحْسِد على سوره البوم

المال ما هو من شروط المروّه

ومن دام له ماله على ماله يْدوم

والفَقْر نَسّى الإبن معنى الأبوّه

يا قوم يا ذيب الرجاجيل يا قوم

حَرفى عن اللي قِدْ مضى لي مفوّه

لا ني بمَعْصومٍ وَلا هو بْمَعْصوم

والحين تِهْنا في الطريق المتَوِّه

حتى السما يا تايهه دونها غْيوم

بلوى الفتاه اللي تسوّي فتوّه

على الذي في الوقت معْطَى وْمَحْروم

غير القرابه والمودّه عِنُوّه

لكنّها تَرْسِلْ مِنْ عْيونها سْهوم

يحْتَرّ دَمّي ما تضيع الحموّه

وارْجَعْ واسِلّ السيف واطيح واقوم

وِتْقول لي سَوّ الذي مَعْك سَوّه

قَبْلِك تعلَّق بي سلاطين وِقْروم