شعر: سالم محمَّد الكعبي

الله يسامِحْك؟ والاَّ الله يسامِحْني؟

والله ما ادْري من المخطي على الثاني

إن كِنْت غَلْطَان واجِهْني وْصَارِحْني

عَشَان حبٍ مضى ما هو على شاني

شَتَّتْ فِكْري.. تفَرِّحني وْتِجْرَحْني

مَرّه تجيني ومَرّات اتّناساني

وانا لي الله ما غيرك مرَيِّحْني

من بين هَالناس لا قاصي ولا داني

شوقي ذبَحْني وغربالي توشَّحْني

وانته مقفّي وَلا تدري عن أحزاني

يا كَمّ غيرك تمنّى لو يصافِحْني

يْمِدّ خمسه وانا عَ خَمْسِكْ أعياني

واذا تذَكَّرْت يوم انّك تمازِحْني

أقول معقول يجفيني وْيِنْسَاني؟!

إن كاني أخْطيت يا المضنون سامِحْني

عَشَان حبٍ مضى ما هو على شاني