شعر : خالد عبدالله الظنحاني

الرجا والياس والإنسان حِيْله

والمواقِفْ ما تبان إلاَّ بَاهَلْهَا

اتبعي قلبك وْعِيْشي بالْف ليله

وارحلي يَمّ البلاد اللى رحَلْهَا

الظروف المستحيله مستحيله

ومن حمَل دنياه لازِمْ يحْتِمِلْهَا

وانتيْ لَمّا شِفْتي القِصّه طويله

إنتهيها قَبْل ما يكْبَر أمَلْهَا

الليالي نَزْف والفرقى ثقيله

والمدى يكتِبْ على افراحي أجَلْهَا

إرسميني طَيْر يِتْهَجَّى رحيله

واقتلي حِلْم الحروف اللى جزَلْهَا

اسكبيني شوق راحِل وانحني له

وادفني ذكرى لياليه وْغَزَلْهَا

كلّما شِفْت الرطَب أرثي نخيله

وكلّما شِفْت النَحَل أبكي عسَلْهَا

ازدواجية رثا رُمْح وْقتيله

والقلوب إنْ ذِيِّرَت شَدَّتْ رَحِلْهَا