شعر: حميد بن ذيبان

الخَدّ به وَرْد كيف شْفاه والمبْسَم

واعيان دَعْجَا سِحِرْها حِسْنه عْجوبه

رعبوب فايج حِسِنْ فايع صباه وْزَم

مِسْتَنْحِلْ الخَصْر والمصعاد عَرْقوبه

ناصع بهاته وْمِسْتَنْقِطْ بياضه دَمْ

بالهون لو هو عَيِلْ يَمْشي على دوبه

مِزْهِرْ شبابه ويانع غَرْنَجِي واعْجَمْ

خَذْني وداده وْمِنّي الروح مَنْهوبه

لَحْظه رماني وْمَعْلوقي له اسْتَسْلَمْ

كل الجوارح وروحي مَيِّلَنْ صوبه

وِدّه مَلَكْني غدا لي في غرامي عَم

مْطيع له حسب مهْواته وْمَطْلوبه

يامِرْ عليّه ودايم كلمتي له تَم

من دون شوفه حياتي هوب مَحْسوبه

أهواه وافداه وِدّه في عروقي نم

للنفس نشوَه وْلِلْمَعْلوق مَحْبوبه

راعي يديلٍ يثيل مْعَشْكَلٍ وافْحَمْ

من كحلة الليل لى مِنْ غَوَّقْ غْيوبه

والدرّ من حِصّ لجّات الغِزَرْ في الفَم

والشَّهْد سَلْسَل سبيله عَذْب مَشْروبه

لو وِدّ وِدّي تجمَّع شَمْلنا والتَم

ولو وِدّ وِدّي فرَشْت الوَرْد بِدْروبه

ولو وِدّ وِدّي على جَمْع البريّه عَم

الخير والسِّلْم شَدّ وْشَيَّد طْنوبه