يا واقفه تستجوبين الصمت في الوَجه الشحوب

قَدْ لا يجيب الصَمْت وِيْطول انتظارك واقفه

تؤكّدين.. انّ الزمَن يزْرَع تجاعيد وْندوب

وليش جيتي تسأليني دام وانتي عارفه

هنا.. هنا يا واقفه شاعِرْ على حَدّ النضوب

استنفد أفكاره وَلازالت جروحه نازفه

ثامن سنه آخِيْط وافَصِّلْ من الأحلام ثوب

أكْبَرْ أنا والثوب يقصَرْ مثلما انتي شايفه

لا تحزني والشِعْر مِثْل الصِدْق في عْيون الكذوب

قَدْ تختلط زيف المشاعر والنوايا الهادفه

نوب التمس فيه الأمل والهَمّ والإحباط نوب

واحيان في دَرْبي يجي يزْرَعْ عبوّه ناسفه

ولى يقول ان انتقاد الذات تكفير الذنوب

مبدأ.. ولي وجهة نظَر.. أوافقه واخالفه

أوافقه بَاْن البدايه صَحّ والمخطي يتوب

واخالفه إن قام يهدم ما بنَتْه العاطفه..!

والشاعر اللي غَرّه التغيير واغراه الركوب

موجه تسوقه لين ترمي به بقلب العاصفه

يذكر خويّه كل ما هَبَّتْ على شْراعه هبوب

واليا احتمى الموقف.. خسَرْ شِعْره ويترك ماقفه

وان ضِقْت يا صَدْر الشمال الوِسْع في صَدْر الجنوب

والفلسفه وجهة نظَرْ.. وانا من الفلاسفه!!