خِذْ رسالة وِد نَصَّيه
عبر هَـ الجَوَّالْ راسِلْها
من صميم القلب مهْديّه
لك يا اعَزّ الغِيْد واجْمَلْها
لك مطَرِّشْها خصوصيّه
وانتبه يا خِلّ تجْهَلْها
يعْلَمْ الله مَقْصَد النِيّه
صافيه والحب داخلها
المشاعِرْ لِكْ صدوقيّه
وافيه والقَلبْ حامِلْها
فيك هايم والهوى غَيّه
والمحَبّه طِحْت باوَّلْها
المحبّه لا إراديّه
ما تعَالَجْ لو تعابِلْها
أثَّرَتْ بالحيل هي فِيّه
وْصِرْت هايم في سواحِلْها
حالتي صارَتْ شقاويّه
والهوى عِلّه معَلِّلْها
هايمه روحي وْمَبْليّه
النيَا والبِعْد قاتِلْها
عايش بْدنيا خَلاويّه
وَيْل روحي من هوايِلْها
كم جروح القلب مَخْفيّه
بالصَّبِر دايم أجامِلْها
قصّة الأحزان مَنْسِيّه
والسعاده قِمْ نواصِلْها
خَلّها الأحلام وَرْديّه
عِشْرِتِكْ بالوِدّ كَمِّلْها
المودّه دوم عَفْويّه
والمحبّه حَيْل ما اجْمَلْها
لك قصيدة وِد نَبْطيّه
واضحه يا زين واقْبَلْها
أنْتِظِرْ مَرْدود خَطِيّه
مِنْك يا المضنون تَرْسِلْها