مَبْروك لِ (الأهلي) على الفوز مَبْروك

من شاعرٍ هاوي (شبابي) مَرَدّه

وْمَبْروك لاهْل العز بالعِز عَزّوك

من لاعبين وجملة جْموع حَشْده

لو حاولوا أهْل النوادي يردّوك

عن مطمعٍ مَشْروع مَنْواك قَصْده

عَنْك إقْصَروا لو هُمْ على الفوز هَنّوك

والعِضْد يقوى لى قوى عظم زَنْده

والكاس يغلا لى غدا عاد مَشْروك

بالدِّرْع في الحسبه شرى العام جَرْده

شروى (الوَصِلْ) والأمر بالجهد مَدْروك

ما بيننا والكِل يوفي بوَعْده

نوطى الجمر وِنْدوس حِفّاي عَ الشوك

ونجني ثماره قبل ميحان حَصْده

ودام الترابط بيننا هوب مفكوك

يعني تلاحمنا كما صَف جِنْده

والدِّرْع نبرى له وفي الخَلْط مَدْلوك

لو بَيَّن هْلاله على شوف بِعْده

ويوم الزعامه بين بن عَمّك وْخوك

وين ما تكون تْكون مَحْسوب عِنْده

ويا شيخنا (حَمْدان) من هو شرى ابوك

ذاك الأسَدْ مَعْروف والشّبل وِلْده

الأمر لك يا نسل الاجواد مَتْروك

بِيْدِكْ (وليّ العهد) فَكّه وْعَقْده

خَصَّوك يا نجل الأكارم وْوَلّوك

لِـ (دْبَي) مجلسها الرياضي تعِدّه

واهل الشِّعِر يا طَيِّبْ الذِّكِر عَدّوك

أميرهم في الشِّعر نَظْمه وْعَدّه