شعر: قمره

تدري من العام عَنّي يا طموحاتي

لا والله إلاَّ آتباهي فيك واعِدِّك

واعَلِّقِكْ فوق حِلْمي واحتمالاتي

وابَرْوِزِكْ في حنايا الجوف واشِدِّك

لا تكْسِر الحوم في ليل الجفا الشاتي

أخاف مِنّك عليك وْما ابغي آضِدِّك

مِدّ الجناحين وِجْنوحك عريضاتِ

خابِرْ عزومك تزيد إصرارك وْجِدّك

لا يزعجك دَمْع عيني من تنهَّاتي

أحيان تنزِلْ دموعك وانت ما وِدّك

واللي غيابه مأثِّر في قراراتي

لو كان لك شَيّ عنده كان ما هَدِّك

كَمّ إعتبرته وخَوَّنْ في إعتباراتي

يا لين كَدَّرْ صفاك وْضَيّعه وِدِّك

يا قلبي انْت الكبير وْمَعْدِنِكْ ذاتي

لو تلتوي كَنَّها ما تلتوي يَدِّك

والايَّام أولى بجرحي في مداواتي

عن ماضي الأمس يزْعِجْ يومك وْغَدِّك

يا نَهْري العَذْب رَغْم الجَرْح وِشْتاتي

وانته مِثِلْ ما انْت ما توْقَفْ على حَدِّك

بِيْض المعاذير تغْفِرْ لي خِطِيَّاتي

والخاسِر اللي خسَرْك وْما كسَبْ وِدِّك

أفْضَلْ من البوح عند الحاقِدْ سْكاتي

يحْلَم يِطُوْل السّحاب وْلا اكْتِشَفْ سَدِّك