يا طفلة العيد والأعياد طِفْل وْقصيد

ناخِذْ مِنْ الطِفْل فَرْحَةْ عِيْد وِنْعَايده

يَسْعِدْ صباحك إله الكون.. عمرٍ مديد

يا جوهره في ثياب أطفال مِتْفَرّده

خَذْتي من امّك وصوف الحِسْن حِسْنٍ فريد

كَنّ أمّك اللي مكانك بالنظَر شارده

قولي لها انّي مِثِل ما كِنْت شوقي يزيد

طِفْلٍ وارَبّيه مِثْل أطفالي آشاهده

يكْبَرْ واسَلّي خفوقه بالدعا والنشيد

يلين بان الوَرَعْ في عينه المجهده

عن شوف غير الحبيبه صار شوقي بليد

يا طِفْلة الغاليه يا طِفْلة المِبْعِده

قولي لها انّي مسامح لا وعَد أو وعيد

والله يوفِّقْ حبيبة قلبي الواحده

وانا مِثِلْ ما انتي تشوفين بأسي شديد

باصبر عسى الله يسَلّي قلبي وْيسْعِده

دام الحبيبه غدَتْ حِلٍ لغيري أكيد

تحْرَم عَلَيّه ولوهي في النظر قاعده

حبٍ عطيته لها كِلْ عام عيده سعيد

قَفَّلْت قلبي عليه وْنَبْضته خالده