مبروك لك يا أم الوفا هالمِسِيره

يَعْل الهَنَا والسّعْد دومه يباريك

يا من سقيتي عَذْب صافي غديره

يروي العطاشى فايضٍ مِنْ مغانيك

مَدَّةْ يدينك بالعطايا كبيره

ما اقْدَرْ أوَصِّفْ مُوْل مَدَّةْ أيادِيْك

تَعطين دايم بالخفا والستيره

يا الله عساك بْخَيْر مِدَّةْ لياليك

لك في قلوب النّاس حِبٍ عِبيره

كَنّه فِتيت المِسْك يْنفَحْ مياريك

يا أم الشّيوخ الوافيه يا الشِّهيرهْ

ما حَدّ مِثْلك يِشْبهِكْ في مَعَانيك

إنتي لنا كَضَيّ شَمْسٍ مِنِيره

يَا مَا تِشَعْشَعْ نورها في مفَاليك

وانْتِي لِنَا مِثْل الغيوم المطيره

تَنْبِتْ بها أعْشاب خَيْرِكْ وامانيك

تسقين دارِكْ بالسّخايا الغزيره

يا ما عيون الناس كِلْهَا ترابيك

أدْعو إلهي بالرجا واسْتِخِيْره

يِحْفَظْك لْنَا وبالسّعاده يِهَنِّيك

وِيْديم عِزِّك يا الوفيّه ذِخيره

تاجٍ على روس الخلايج يِحَلِّيْك

يَا أم اليتامى والأرامِل جِديره

بْهَا الوَصِفْ يا اللى نِفَاخِرْ بِطَارِيْك

في كل مكان وكل مَحْفَل وْدِيْره

إسْمِك رَمِزْ للخير مَحْدٍ يجَاريك

يا بنْت مَجْد وْبِنْت عِز العشيره

يا وَرْدِةٍ في دوح يِنْفَحْ حوَالَيْك

نَدْعو لك المولى حياةٍ قِرِيْرِه

وبالدين والتقوى يِحَقِّقْ مَنَاوِيْك

ومِنّي لك التّقدير يِسْمَعْ هديره

مِن قَلْب صَادِقْ بالمسيره يِهَنِّيْك