ألا يا قَلْب لا تِشْرَه عليه وْلى متى غِيْره؟!
يغيب؟! بْراحته خَلّه يروح بْعالَم النسيان
كفاك تْدَوِّر أعذار لْغيابه فِضّها سِيْره
تماديت بْغلاه ومن تمادى بالغلا خَسْران
أبَدْ ما فيه بالدنيا بشَرْ يستاهَلِكْ غَيره؟!
يغيب وْلا رجَعْ ما كَنّك إلاَّ العاشِقْ الوَلْهَانْ!!
أنا ما اقول /لا ما اقول/ ما انت بْشَايفٍ خَيره
وانا ماني بقايل صاحبك وافي وَلا خَوَّان
يقولون القمر لا غاب يضوي له على دِيْره!
وانا اقول الحبيب إن غاب يضوي له على خِلاّن!!!
أجل شَـ اسباب هالغيبه؟ وابي أسباب تاخيره؟
وابي ليه الجفا يا قَلْب واْنت بْغيبته حيران؟!
شهَر واكْثَرْ وَلا طَرَّشْ عن غْيابه معاذيره!!
يا ليته لو تعذَّرْ بالظروف وْلايمه غَلْطان
تعبْت وْلا طرى له يتّصِل قِلْ عِلّها خِيْره
وش انت متعّبٍ حالك على واحد قليل احسان!
يجي مَيِّتْ وَلَه لا من شكا وقته وْتَعْزيره
واذا قَفَّى على وَجْهه حبيبك (ناقة عْريمان)!!
أقول إنّه موالِف له بشَر خَلاّك تقزيره؟؟
واقول إنّك على هامش حياته ما بقى لك شان؟!!
مَعْ اللي ما له (سْبوق) اتْركه شِفْ واحِدٍ غَيره
وانا شوري عليك تْلَحّقه في سبْعة الشيطان
ذبَحْك الطّيْب يا قلبٍ تعَذَّبْ من مقاديره
يا عَنْك إنّك خفوقي خابرك ما تعرف النكران
تقاضى لعنبو جَدّ الغلا ما تنفع الذيره
ترى مَنْ لا تقاضى يا خفوقي هالزمن ينهان
حبيبٍ ما صفا لك طِيْع شوري بَدِّلْ بْغَيره
وانا شوري عليك تْلَحِّقه في سبْعة الشيطان!!