مَبّروك يا اللى غايته كل نايد

لى ما حسَبْ في مِشْتراه الخساره

يحِبّ الاوّل دون ناقِصْ وْزايد

خَذْ غايته واعْلَنْ عليها احتكاره

طَلْعه بعيد وْيَتِّسِمْ بالركايد

لِلْمَجْد مَجْد.. وْلِلْحضاره حضاره

وْصَرْح الرياضه له بشَخْصه فوايد

النادر الشامل وْرَمْز الجساره

أحيا التراث وماضي الوَقْت عايد

يحرص عليه وْلاَ يحِبّ اندثاره

يستاهل الناموس سَبْق التلايد

الاشواط والكاسات تَحْمِلْ شِعَاره

وراعي العوايد ما له إلاَّ العوايد

تكتيك واثِقْ واحتراف وْشِطَاره

عَزْمه على كَسْب الطويلات رايد

طبْعه وْخِطْواته بحسْب اختياره

(حمدان) كِلٍ به يقول وْيِشَايِدْ

وهذي حقيقه في صريح العِبَاره

إن مَرْني طاريه كَنّي معَايد

واسمه على سَمْعي يسوق البشاره

قَدْره كبير وْبِالْغَلا له زوايد

من طِيْبته يَفْرِضْ علينا وقاره

جَذَّاب، شاعِرْ تهتويه القصايد

خَيَّال فارِسْ.. والصِّقَاره صِقَاره

كريم سَبْلا.. ما يحَسْب الزهايد

مَدّة يمينه ما تعَرْفه يساره

إن قِلْت فيه آضيع واصبح محايد

و(المستحيل) أوصل لوصفي شناره

نسخة (محمَّد) في الأمور الشدايد

أخلاق وِفْعولٍ تنال الظفاره