شعر: حمد بن مشوط المري

إسْأل عيوني وين بَتْقول لك وين

لاحِظْ عيونك يا حبيبي رماني

واسأل خفوقي كان للحب دَرْبين

في خافقي غير الصبر والأماني

أهيم في قِصَّه بليَّا عناوين

كَتَّابْهَا طَرْفِكْ وْطَرْفي دعاني

أسري وحيدٍ في ثرى الشوق والبين

وارْقب وصالك يا قمَر من مكاني

واشوف حولك فاتنات المزايين

يا احلى وْأَغْلى من جميع الغواني

في طَلِّتِكْ تملي حياتي بساتين

وفي غَيْبِتِكْ قَفْرٍ طغى واحتواني

وفي بَسْمِتِكْ كل المناظر بك تْزِيْن

وفي صَدِّكْ الحِزْن الأليم إلتواني

وفي ضِحْكِتِكْ نسمه هواها رياحين

وان غِبْت أنا ليل الكآبه سباني

يا من سِكَنّي في الهوى سْنين وِسْنين

رِد النِّظَرْ عِطْني من العمر ثاني

وْنَظْرة عيونك لي تساوي ملايين

وِشْ عاد لو أمْهَلْت عينك ثواني

أبيع عمري واشتري نَظْرَةْ العين

واسْكِنْ عيونك وارْتِحِلْ عَنْ زماني