شِفْني وْرَسْلان العيون تْلَبِّيْ

لا مَدّ لي حِزْن المسَا فِنْجاني

ما طِحْت لكن هالدَّمِعْ عَزَّمْ بي

يا اللى أموتك وانت ما تحياني

ما دامني صايرلك (المتنبّي)

لا تْصِيْر (سيف الدولَه الحَمْداني)

نار اشتياقك يا متى تلْهَبْ بي

يا اللى بْبِرودِكْ هالسَّهَرْ دَفَّاني

زَرْفَلْت لك يومك عجَزْت تْخِبّي

وْعزَفْت من حِدْب الضلوع ألحاني

ما دِمْت حَيٍ والهبوب تْهِبّي

والنور يضْحَكْ في سواد أعياني

ما انسى شمَالك لوْ الزمن جَنَّبْ بي

يا اللى عيونك ضحكتي واحزاني

يا مِبْعِدٍ وِلْك المسَا قَرَّبْ بي

للضِّيْق تكتبني وْهو يقراني

عيني رحيل ويا مُدِنْ مَرَّنْ بي

لين ابتسَمْت وْقِلْت حَيّ أوطاني

يا ذا النِّسَبْ أنا النِّسَبْ يُنْسَبْ بي

لو طاح بك آسَنّدِه ذِرْعاني

من وين ما اجْلِسْ يا زمَنْ رَتِّبْ بي

وِيْحِقّ لي لا ابطيت بك تبداني

جادَتْ ليالِكْ أوْجِهْ وْشَحَّنْ بي

وْكَم هالجفاف آظَلِّلِهْ أغصاني؟

أنا الغريب اللي البكا يرْحَل بي

كَنّه على دَرْب الدَّمِعْ عِنْواني

وانا الطريق اللى البطا مغْرَمْ بي

من وين ما طاش سْهِمَهْ يلقاني

وانا الليال اللي الشموع تْشِبّي

في صِبْح غيري وْلا اشْرِقَوا خِلاَّني