يا عِزَّةْ النَفْس وين السَيْر هالمَرّه

والضيم في العين والمشوار إلزامي

والعَزْم بركان فيه الحَرّه الحُره

والعَبْره انسان يصْفَعْ مَدْمَعٍ ظامي

والحَظ مديون والديّان ينْتظْره

لا هو وصَلْني وَلا وصْلَتْ له أقدامي

والضيم فرعون ظالِم والحِكُمْ بَطْرَه

والعِز مرْبَط حياة القلب والهامي

وِشْ حيلتي والنظَرْ أطوَل من النظره

والوقت يغْزِلْ شقاي وْيَنْشِل أعوامي

والنَفْس مَرْكَب طموحي والعمر بَحْره

يابِس وْعمْقه شِبِر وِرْياحه أحلامي

يا عِزّة النَفْس يا المجداف والنشْرَهْ

يا راس مالي الثمين وْكَنْزي السامي

الشور عندي وصبر (أيوب) بَنْصِبْره

لا باس والعمر باذن الله قِدّامي

والعِزّه اللي عليها الكَبْد تِتْشَرّه

تبقى وكَبْد الشَّرَهْ تَنْفِدْ وْتنسامي