أنساك.. وانسى اشْ لون رِمْت وْنسيتك

واتْذكَّرِكْ.. واهيم وارْجَعْ أكابِر

واقول: ناسي وانت أدرى.. فديتك

إنّك في قَلبي.. مِثْل ما كِنْت خَابِر

لا زِلْت أوّلهم.. وَلا زال بيتك..

صدري.. وَلا زالت جروحك مَنابِر

هَدّيت حيلي يا غناتي وليتك

فَكَّرْت: وش تالي الجفا والمكابَر

إن كان ما تدري تراني بكيتك

مثل (الكويت) اللى بكَتْ موت (جابر)

ما اقول أنا.. من دَمّ قلبي عطيتك

لاْنّي رضيت أبقى لْضريحك مقابِر

حاوَلْت أعْلِّمْك العطا.. وْما لقيتك

لا فيك مَعْنى.. وْلا لفَتْك المخابِر

تدري وش اللي غاظني يوم جيتك؟

إنّي عشانك بِعْت ناسٍ أكابِرْ

صحيح من قلبي.. عشَقْت وْهويتك

وانت فْـ حياتي كِنْت إنسان عابِرْ

لكن رَغَمْ إنّي هويتك.. جفيتك

لاْنّي أبَدْ.. ما الوِّحْ لْشَخْص دَابِر

صاليت في بِعْدِكْ.. وياما دعيتك

يا لين جَفَّتْ من نِدَاك المحابِر

بْذمِّتِكْ.. إن كان رِحْت وْرميتك

بَتْتّم مِثْلي.. يا منى الروح.. صابِر؟

وانته تغيب وْتحسِب إنّي نسيتك

وانا عليم الله.. أذْكِرْ واكابِر!!