إن كان موتي وسيله من أجل غايه

باموت لاجلك حياتي يا نظَر عيني

يا بَعْد كل البشَرْ يا نور.. دِنْيايه

يا بَهْجتي وانْشِراحي وْكل ما فيني

ما هَمّني إلاّ رِضَاك وْعندي كْفايه

راحَتْك هَمّي طموحي وْشَي يَعْنيني

شِفْ حالتي في غيابك حاير وْتايه

حزْني تمكَّن وكل شَيٍ يبَكِّيْني

أسْهَرْ على صُوْرِتِكْ سَوّيتها مْرايه

ايلين صارت بوجهي وْفي تلاويني

تصبح وْتمسي بعيني وساكن أقْصايه

في مهجتي واتِّسَلَّلْ في شراييني

إقْهَرْ ظروفي لعيني وارْفَعْ الرايه

للحب سَلِّمْ وْخَل يْديك بِيْديني

وَصْلك رجايه وْشوفك غاية مْنايه

بَتْرِد روحي وْبَتْزَهِّرْ بساتيني

خَل الغلا لك وسيله تِبْلِغْ الغايه

وانا وْقلبي وْعيني لك عناويني

يا رَبّة الحسن حسنِكْ في البشَر آيه

وانا اتحدّى إذا مِثْلِكْ رَأتْ عيني