مبروك يا نسل العزيزين
(حمدان بن محمد) وْ(مكتوم)
باعداد ما صَلَّوا المصَلِّين
واعداد ما يومٍ تلا يوم
انتو لها ساسٍ عريبين
كَفْوٍ لها يا صفوة القوم
أفراحكم عَمَّتْ ملايين
يا الله عساها للأبد دوم
تعلى المناصب وِبْكم تْزين
يا ذِخْرنا يا نسل لِقْروم
(حمدان) يا كم لك محبّين
على المعاني وْطِيْب لِعْلوم
قرمٍ يساوي ناظر العين
وعند العَرَبْ غالي وْمَحْشوم
فارس على كل الميادين
من يوم صِغْرك وانت شَغْموم
يحفَظْك رَبّي قولوا آمين
من شَر هالدنيا وْلِهْموم
وتبقى ذخر كل المساكين
يا عونهم إن حَقَّتْ لْزوم