سلام يا شيخ المكارم وْسَهْلين

يا مرحبا والقاف في حَضْرتك زان

سلام يا شيخ العَرَبْ والْف نِعْمين

سلام من قلبٍ.. وْروحٍ وْوِجْدان

يا شيخنا (مْحَمَّد) يا طلْق الحجاجين

يوم ان بَعْض الناس مَعْقود حِجَّان

يا شيخنا (مْحَمَّدْ) يا ذَرْب الميامين

يوم السِّمَلَّقْ ضَيَّعوا بر الايمان

يا الشيخ (أبو راشد) يا رجْح الموازين

يوم ان غيرك لا وزَنْ وَزْنةٍ خان

يا الشيخ (أبو راشد) يا سِقْم المعادين

يوم ان غيرك في اللِّزَزْ صار بَلْشان

حَرَثْت قاع البحر يا أحْمَرْ العين

واصْبَحْ أجاجه زل صافي وْرويان

وفرشت كفّك فوق أرضك وْ ذا الحين

صارت تشابه جوهره وِسْط بستان

من هو تواضَعْ للضعوف المساكين؟؟

واسخى بماله لاجلهم دون حسبان

من هو عمَرْ فكر وْثقافة ميادين؟؟

غيرك يا (بن مكتوم) يا أَطْنَخْ إنسان

وجهك عليه مْن الطهاره براهين

وقلبك روى بين النقاوه والايمان

نِتْيَمَّمِكْ لا أصْبَحْ العِلْم عِلْمين

وِنْرِدّها لك لا قِسَا الوقت أو شان

مَلَكْت أرض الطيب من غير تثمين

وْذَلَّتْ لجاهك غصب طوعٍ وْصفطان

انْت الكَرَمْ مِنّك خِلِقْ فيه رِجْلين

قام يْتِمَشَّى في الخرايِطْ والاوطان

قبلك وصوف الجود مشروع تسمين

لقمه قليله قِيِّدَتْ باسم مَنَّانْ

وْبَعْدك غدا مَدْبول تِسْعه وْتِسْعين

وْتبقى السِّيَرْ شاهِدْ ولا غيرها لْسان

(مْحَمَّدْ ابن الذيب) نادى للاقصين

أبغى عماره من سلايل (كحيلان)

قِلت العماره برْج واصل الملايين

ما تِرْخَصْ إلاَّ من صميدع وْطَنْخان

(حاكم دبي) حاكم أراضي الكريمين

إلاَّ انْت حاكم بَحْر أصله محيطان

وان جَتْ بطاري الشِّعْر قِدْ لي من سْنين

أبَاكْتِبِكْ بَس الشِّعِرْ مِنْك خَجْلان

كيف أكْتِبْ البَحْر وْيديني قصيرين

وما اقْدَرْ أحاوِطْ بَحْر من بين شطآن

صاحب سمو مِنْك السمو يَبْهِرْ العين

وْعِز الوقار مْلَبَّسٍ مِنْك تِيْجَان

حَرَثْت قاع البَحْر واثْمَرْ بساتين

وحصدت حب الكل في كل الاوطان