شعر: سعد مرزوق الحبابي

يا مَعْشَر العِشَّاق هيهات هيهات

ما احْدٍ جَرَيَ له بالهوى ما جَرَيَ لي

ذِقْتوا الشقا مَرّه وانا عَشْر مَرّات

وْجَرَّحْني اللى بالهوى ما يبالي

غاب وْتَرَكْني في هموم وْمتاهات

في غيبته يا وَجْد حالي لحالي

يا مَعْشَر العِشَّاق بِسْكات بِسْكات

خَلّوني أذْكِر صورته في خيالي

أبي اشوفه والمَحْ الخَدّ بالذات

واحْضِنْ طيوفه لين يرتاح بالي

ما تعرفون انّي من اسبوع ما ابات

سهران واحَسِّبْ نجوم الليالي

العاشق اللي مات قَلْبه وَلا مات

الله كتَبْ له يَفْقِدْ انسان غالي

والموت له سَكْرَه وللحِبّ سَكْرات

من سَكْرِتِكْ يا حبّ (يا هملالي)

تكفون خَلّوني ولو خَمْس ساعات

أرتاح واهيجن ليا من طَرَيَ لي

وانظم قصيدي واحْبِكْ أبيات بابيات

لانّ القصيد أصْدَقْ صديقٍ صفا لي

يا هاجسي قم هات قم هات قم هات

من صادق الإحساس شِعْرٍ مثالي

شِعْرٍ عليه مْن التوجِّد علامات

خَلّه يهيِّضْ كل من كان سالي

وْيعَلِّمْ اللى يَقْطعون العلاقات

أنّ المفارَقْ مُرّ والوَصِلْ حالي

البارحه سهران وافكاري أشتات

واقول في هذا الزمَنْ وش بقى لي

وِهْموم قلبي صوب قلبي سريعات

كَنّي أقول لْهَا تعالي.. تعالي

جَلَستْ أفَكِّرْ بالزمان الذي فات

يوم انّ قلبي من عنا الوقت خالي

حِلْمي صغير وْلا براسي طموحات

وكان الفَرَحْ عندي يشابه ظلالي

واليوم أشوف الدَّرْب كِلّه مَلَفَّاتْ

وِطْموحي الأوَّلْ وَلا اصيرتالي