تِلّ القدَمْ حَتَّى ولَو هى حافيه

واخْلِفْ هقاوي من يشكِّك بالوعود

يحلا اللقا يوم النوايا صافَيه

لكن حلاة الوعد والنيّات.. سُود

يا صاحبي.. يا بو العيون الغافيه

رمشك تحَدّاني وأنا شخصٍ ودود

أكْتِبْ على جفنك قصيده وافيه

واقرا على أهداب عينيك الردود

واذا بغيت أبْهِرْك أنا بالقافيه

آشوف نفسي منبهِرْ فيك وْأعود

الله يعلم بالأمور الخافيه

والاَّ انت يفضَحْ خَافِيِكْ بَعْض الشهود

حِضْنك.. ولمسات الكفوف الدافيه

وْنَظْرات من عينك يخالِطْها البرود

يشهد لك الطبّ بْأمورٍ شافيه

ريقك دوا للهجر وانواع الصدود

ويشهد لك النَّحْل بْأمورٍ كافيه

يومه تحرَّى خَدّك أزهار وْورود

نورك سَنَا وانوار غيرك طافيه

يا نور ما يحتاج كَهْرَب أو عمود

أحلى كلامِ مِنْك (إيه) الهافيه

أسْرَعْ من التفكير في لحظة جمود

واكْرَهْ كلامٍ منْك (لاء) النافيه

تنفي أمَل موت الحواجز والحدود

بَعْض القلوب تْموت موته جافيه

لكنّها تبقى على الذكرى خلود

يبقى الغلا يوم الفرَصْ مِتْكافيه

ما بين لِبّ القلب وِعْروقه يذود

وْتبقى الدموع فْـ بحر عينك طافيه

ويبقى غلاك لْسِجْن صدري والقيود

هذي القصايد والعهود الوافيه

لِرْضاك أخِطّ أجْزَلْ معانيها واجود

خَلّ القدَم تمشي ولَوهى حافيه

وْخَلّ العواذل تكثر بْشكّ الوعود

دام اللقا يقبل بْنِيّه صافيه

لا تبتعد عَنّي إذا النيّات سود