يا عوَضْ (زايد) وْ(راشد بن سعيد)
يا بَخَتْ دارٍ وْشَعْبٍ تحكمه
يوم شوفك عند شعبك يوم عيد
كم منكوبٍ بوصلك ترحمه
يا سَنَدْ شعبك وْفي الشِّده عضيد
ما خطى من سار نَهْجٍ ترسمه
حبّك اللى يجري بْدَم الوريد
انت يا اللى به تِحِس وْتفهمه
رحمة المعبود انته يا رشيد
موهبه للشعب مِنْه وْمَكْرمه
قايدٍ يا قل مثلك يا عجيد
ما اكبره قلبك وْعَقْلك ما احلمه
وين مثلك في الزمن رايه سديد
يا المقام العالي وعالي هْممه
ثابت بْدينك وْعِلْمك يا مجيد
في تحَدِّي ذا الزمن والعولمه
يا (محمد) نَظْرتك تبْعِدْ بعيد
كم لى يقصر بْعِلْمٍ تعلمه
مفردات الشِّعر وِقْوافي القصيد
ترتفِعْ باسمك وْفِعْلك يلهمه