شعر: الشيخ محمد بن راشد آل مكتوم

بينْ الرِّويسْ وبينْ لِيوا مودِّهْ

راعي الهمومْ بها يفرِّجْ همومهْ

ناخذْ بها مدِّهْ ولا شيْ رَدِّهْ

يالينْ نبذلْ كلْ جهدٍ نرومَهْ

دارٍ بها جدِّي ومنْ قبلْ جدِّهْ

منْ رَملها التَّاريخْ سجَّلْ علومهْ

في كلْ خايعْ للشِّهامهْ مخدِّهْ

وفي كلْ محضرْ للمروَّاتْ قومهْ

وقتْ التَّعبْ والعسرْ زندكْ تكدِّهْ

وقتْ الرَّجلْ ما تفيدهْ إلاَّ عزومهْ

شدِّهْ وحِدِّهْ في الزمانْ ويضدِّهْ

وقتْ الرِّخا هذا ووقتْ النِّعومهْ

يا أهلْ الوزارهْ كلْ فردٍ بجهدهْ

لأجلْ الحكومهْ والرِّجا في الحكومهْ

واللِّي إمْنِهْ لابِدْ يا شيخْ بَدِّهْ

ولي ما يلومْ النَّفسْ نَفسهْ تِلُومَهْ

ودامْ الوزارهْ بالعملْ مستعدِّهْ

فالناسْ تشهدْ كلْ خيرٍ تشومهْ

وإذا الوزارهْ ظالمهْ ومستبدِّهْ

فأنا بري منْ كلْ ظلمْ وخصومهْ

هذي أمانهْ ثقلها زادْ حَدِّهْ

واللهْ يوفِّقنا عليَ مانرومَهْ