بَطَّلتْ أحِبّ وْعِشْت دنياي مرتاح

حتى الهوى غيّرْت فيه اتّجاهي

لا حِزْن.. ولا دمعه.. وَلا ذِلّ وِجْراح

لا القَلْب مشغولٍ.. وَلا الفِكْر ساهي

بَدَّلت كلْمَاتْ الغَزَل جِدّ وِصْياح

لا عاش من يقْدَر يعَكِّر مياهي

يا كِثْرِهِنْ حولي ينادِنّ يا صاح

حلوين.. بَسْ ما يلفتِنّ انتباهي

يِتْسَاءِلَنْ عن قلبي اش لون ما طاح

بكلمه.. وَلا عبّرْتهِنْ من شفاهي

من جا.. يجي.. وان راح.. ما اقول من راح

طبعي كذا.. ما اهْتَمّ.. ما هو تباهي

أباخِذْ الدنيا دَلَع.. لِعْب.. وِمْزاح

وان عاندتْني.. قِلْت يا انا ويا هي

إن جيت أقول الآه.. بدّلْتها آح

ما احْدٍ يحاسِبْني على قول آهي

لي عين مجنونه.. ولي طُول فَضَّاحْ!!

ويا ما تَحَتْ بَعْض السواهي دواهي

من راس مالي لي قصيده وْمِسْبَاحْ

وْقَلْبٍ خَضَرْ.. من بَعْد الاحزان زاهي

مرتاح.. بطَّلْت الهوى.. صِدْق مرتاح

أبغي كذا .. آعيش دنياي لاهي!!