أبشِّرك يا (مْحَمَّد) بْجدّين

(زايد) و(راشد) والعَرَبْ تشْهَدْ

وانا اشْهَدْ أنّك صفوة الصافين

عَمّك (خليفه) وجدّك (مْحَمَّدْ)

ظَهْر وْبَطِنْ مَنْتوب من صوبين

مجدك تليد وْعِزِّك مْخَلَّدْ

يا الحر يا ابن الحر لك نَهْرين

من جَنّتين دْروبهن عَسْجَدْ

أم الكَرَمْ وام الشَّرَفْ والدِّين

من وين ما صَدّيت لك مِرْفَدْ

ومن وين يبدا الفخر بك من وين

وانته نَهَارْ الفَخْر بك سَرْمَد

كيف أْخْتِصِرْ مَعْنَاكْ في بيتين

والقلب معْجَمْ والكلام أبْجَدْ

أنْعِمْ وأكْرِمْ باهْلِكْ السامين

نجم السَّعَد بِقْدومهم يسْعَدْ

يَعْلِكْ لبوك وْهَلْك قرّة عين

وْيَعْل القذى في عين من يَحْسِدْ

أبوك له عِنْد أهْلِنَا تاجين

تاجٍ جديد وْتَاجٍ مْتَلَّدْ

(منصور) ابن (زايد) سما الظامين

السحب تبْرِقْ بِيْده وْتَرْعِدْ

وانته طويل العمر لك جدّين

(زايد) وْ (راشد) والعَرَبْ تشْهَدْ