شعر: محمد حميد المري

أحلى من الوَرْد هَمْسك وابتساماتك

واكْثَرْ من الجُود ما تبديه وِتْعيده!

يا آسر الشَّمْس وين الشمس لفتاتك

صَبَّتْ على التوت سِكَّر في عناقيده

قِلْت أغْتِرِفْ لي أماني ليت ما فاتك

إن الأماني لَهَا في حْمَاكْ ترديده

وانته سهامك سَرَتْ من سِحْر نَظْراتك

تلهب من النور جَوّ الشوق وِتْزيده

يا اللي حلاياك مِنْهَا عامره ذاتك

واجْمَلْ عطا مِنْك هذا الوَرْد يا سِيْده

مالك يمين المشاعر عِقْب كلماتك

أودى بها التيه، ذاق القلْب تشريده

جَتْني خواطِرْك تحكي عن مناداتك

تسألني بْعِلْم أفْهَمْ فيه واجيده

قالت سمعْت؟ وْعلامك؟ وينها ابياتك؟

قِلْت المعاني خِفَتْهَا آه تنهيده

من شَعّة النور واكْثَرْ هَمّي أوقاتك

يجري بها السعْد بَس البِعْد ما اريده

هات الليالي تغيث البَرْق لمساتك

تطوي عَنَا البعْد، حان الوصل تجديده

وان لَزَّمْ الشوق يَجْهِدْ عاشق شْفَاتك

ما ريت حيله سوى صبري على كيده

سَلِّم عَليّ إن قدَرْت وْخَلّ جَيّاتك

تحيي لي الوَرْد رمز الود وِتْعيده