الغايب اللي عن سما البال.. ما غاب
ماني بسائل.. ليه غاب.. وْنساني
ولا ني بسائل والمسا.. ليل.. واغراب
شامي غلانا.. ليه عَوَّدْ.. يماني!
جيته صباح وما لفى الصبح.. جلباب
وارفع رفيقي فوق ما ارْفَعْ كياني
يا صاحبي.. والطيب ما يضْحَكْ بْنَابْ
والمَدّ لي.. يوم بْعيونك.. مكاني
قصّرت أنا؟ مَاْ ادري الفضا ظَنّ وِعْتَابْ!
أبطيت؟ والاَّ ما وفَتْ لي المواني!
أخطيت أنا؟ والاَّ العِذِرْ ما فتَحْ باب!
بخَلْت؟ أو كَف العطا ما مداني!
يا خوي.. والدنيا لوافي.. وْغِيّاب
يا وينه اللي.. لا ذكرْني.. بكاني
ويا خوي والذكرى مطاريد وِحْراب
رمحٍ قتَلْ وآخر جَرَحْ لو خطَاني
ويا خوي .. والمرفأ نوارس وأجناب
والليل هَمّ.. وكل حزنٍ سراني
ويا خُوي وِدْموع الغلا حبْر وِكْتاب
ويا ليت كل من قِدْ كتبته.. قراني!
ويا ليت من يرقى على روس الاهداب
ما يْطيع.. لو دَمْع البعاد احتواني
ويا ليت.. من أوفيه.. في كل مرقاب
ما يْمرّ.. لو هجره.. يمرّ.. وْلقاني!
إن كان بي عيبٍ.. بي الطيب ينعاب
مختارني.. كلْما انتهيه.. ابتداني
والخافق اللي من ترحَّلْت.. ما طاب
لازِلْت به.. بين البشَر الاوَّلاني
من يوم.. تَوَّجْك الغلا.. كل الالقاب
قِلْت العوافي.. يا فؤادٍ.. جفاني
تمرّني ذكراك.. وِتْشَرِّعْ أبواب
واضيع.. بين اللي أباه.. وْيباني
من غبت والأعذار رِجْلي وْرَكَّاب
ولا ارضى لك بْلوم التناسي.. ثواني
بس العِذِرْ يا خوي.. ما يبري مْصَاب
حِلْم التجَمِّلْ.. ما يجمِّل.. زماني
أحباب؟ من هو يفْترِقْ غير الاحباب
يا بَحْر.. كَثَّرْ في عطاه.. وْمحاني
أغراب؟ بكرى نلتقي.. مثل الاغراب
صمت المساء.. اللي تمدّه كساني
ياخذني الهاجس لك أفراد واسراب
واقول يا طَعْن التذكّر.. كفاني
أنا أشهد أنّ الهَمّ.. ما يترك أسلاب
لا انهَدّ سيله.. واستباح المحاني
ما يشبهونك.. لو سنا البَعْض جَذّاب
يا اللي الشِّعِرْ لو ما مدَحْتك.. هجاني
إن جيتني.. جِبْت المجرّه.. ترحّاب
عساي ما افْقِدْ طَلّتك.. يا عساني
وان غِبْت طَلّ الفجر وَجْلٍ وْمِرتاب
دوِنك يا وِشْ نَفْع سْفَرَه يوم جاني؟
ما اظن توردني على جال.. مغتاب
يا نايفٍ.. لو ني نخيته.. فداني
فَضْفِضْ شبابيكك ولو تذري تْراب
يا تْشوف صبحي.. أو تفِلّه عشاني
فَضْفِضْ يفِزّ الجَدْب جُوري وْعَنَّاب
وِيْطِلّ لي ضِحْك الصباحات ثاني
ْ