أطالِعْ للسما ما نِيْب لا مِحْزِن ولا مَهْموم
ولاني فاقدٍ لي حاجةٍ فيها واحاتيها
وانا يوم آتفكَّر في صنيع الواحد القيّوم
يزيد إيماني بْرَبٍ بَلا عِمْدان بانيها
أريت المزنه اللي في سمانا يا (طلال) اليوم
تحِنّ رْعودها وِيْلوح بَرَّاقْ الحيا فيها
تقول انّ الرعود الله حرَمْها من لذيذ النّوم
ليا نامَتْ دقيقه عَوَّدْ البارِق يصَحِّيْها
هبوب الريح تدفَعْها على الهون بْقدَر مَعْلوم
من ادنى الأرْض لاقصى الأرْض بامْر الله توَدّيها
تسير وْكل شِبْر تْمِرّ فوقه ياخِذْ المقسوم
الاْرض القَفْر ترويها والارْض المَيْت تحييها
تفِزْ لْهَا الفياض وْتكتسي بالوَرْد واليشموم
وتشْرَبْها ديارٍ ما يعَرْف السيل واديها
كأنّ الله خَلَقْهَا بين أصابع كَفّ (ابن مكتوم)
وْعَلّمها تسوّي حاجةٍ كَفّه يسوّيها
هذاك اللي ليا منّك وصَلْته قِلْ عداك اللوم
تمنّى اللي تباها واخْذَها من كَفّ راعيها
يمينه مثل (سيف الدوله) وْماله سرايا (الروم)
ولا يرخي يمينه دونها قِدَّامْ يفنيها
يمينٍ لا وقَفْ في وجهها المال انكسَرْ مَهْزوم
تعاديها الخزاين والعطايا ما تعاديها
تساوى في نداه المغتني والسائل المحروم
يمينه ما تفرِّق في العطايا يوم يعطيها
أطاعَتْه المكارم طاعة الخِدَّامْ للمَخْدوم
وجَتْ له طايعه مستسلِمَه قِدَّامْ يدعيها
ليا مِنّه نوى له بامْر ما يحتاج له مرسوم
مراسيمه على صَدْر النوايا قَبْل ينويها
حرام ان النجوم اللي تسَمَّت من قديم نْجوم
لو اختارَت على اسمه غيّرَتْ ترتيب أساميها
لو الله بَشَّرْ أمّتْنَا بغير (مْحَمّد) المعصوم
لاقول انّ البشاره فيه بَيِّنْةٍ مواريها
على ذريّة آدم صار فضله فَضْل شَهْر الصوم
على كل الشهور أيَّامها تقفى لياليها
مهاب القَدْر مثل الحرّ الاشقر لا كسَر في الحوم
تقِرّ لْه الطرايد قَبْل بالمخلاب يدميها
تحارِب هيبته عَنْه العِدى لو هو قويّ عْزوم
وتغزي قَبْله قْلوب العِدى قِدَّام يغزيها
وله سطوَه على الظالِم وله رَحْمه على المظلوم
ولا يرتاح باله لين في عَدْله يساويها
عدَلْ حتى تساوى عنده الحاكم مَعَ المحكوم
وهذي عادةٍ له لو تخلَّتْ ما يخَلّيها
ليا مِنّه تفاخَرْ ما افْتَخَرْ في جَدّه المرحوم
لو انّ جْدوده الدنيا تفاخَر في مواطيها
فخَرْه انّه قسَمْ نفسه على الأمّه ثلاث قْسوم
لِعزّتها وْرِفْعَتْها وحاضِرْها وْمَاضيها
ليا دوَّرْت مثله كَنّي اللي دَوَّرْ المَعْدوم
ومن دَوَّرْ على حاجه عديمه ما يلاقيها
لو أصْنَعْ له بيوتي من رحيق الكوثَرْ المختوم
مزاياه الكثيره في قصيدَه كيف أباحْصيها؟!
وانا يا (بو علي) ما لي فَضِلْ في دُرّها المنظوم
ولكن نَظْمَها مِنّي وْمِنْ فِعْله معانيها!!