صدى دمع

يا طول صَبْري عليك وكِثْر غلطاتك

ويا قوّ قلبِك على هجراني وْصَدّي

يا ليت قلبي يعَرف يْسوّي سْوَاتك

ويا ليت عيني تطيع لْقولتي.. لِدّي

مَعَ ان عيني نظَرْها شَوْف نظراتك

لكنّ قِدْ لي سنَه ماني بمِتْقَدّي

وْمَعَ ان نبضات قلبي لاجل نبضاتك

خَلّيت قلبي يجيب أشواق ويْوَدّي

ومعَ انّك تْعَرْف وش يعني لي سْكاتك

سكَتّ.. كَنّك معانِدْ لي وْمِتْحَدّي

حتى على اذني بخَلْت بْحِسّ همساتك

ما تسمَعْ إلاّ صدى دمعي على خَدّي

بخَلْت بِمْواجهك وِبْهَمْس كلماتك

وْخَلّيتني للهموم وبيّحَت سَدّي

خَلّتْني آشكّ في حِبّك وفي ذاتك

وْخَلّتني أرجَعْ ورا من كنت متعدّي

لكنّها وضّحَتْ لي ويش نِيّاتك

وخَلّتني أعْرِف غلاي بْقلبك وْوِدّي

لو كِنْت غالي ماْ صِرْت آخر عباراتك

اللي تسوِلف بها من باب.. شِف رَدّي

ولو كان لي وِدّ ما قصّرْت خطواتك

واصبحت تمشي ثلاث أمتار وِتْهَدّي

وقفّيت وانا ارقبِك وارجي تِلِفّاتك

واخفيت زولك وانا خَدّي على يَدّي

ومن كِثْر ماني باسامِحْ كل هفواتك

أقول: أزْمَه تمِرّ شْوَي وِتْعَدّي

لكنّك تْحِدّني وتْزيد سَيّاتك

وحدّيتني لين ما وصَّلْتني حَدّي

والله ما كان لي نيّة مجازاتك

لكن تعال وْنبيّن مَدّك ومَدّي

راجِع حساباتي وْراجِع حساباتك

واهدا وْرَكّز ومَيّزْ مزحي وجِدّي

أنا موفّي غلاك وكَسْب مرْضاتك

والاّ انت مخطي.. ومِتْرَدّي.. وْمِتْردّي

كنّك تباهي بظلمك واعتداءاتك

وكنّك تقول أذْبَحِه واحييه.. من قَدّي؟

وكنّك تجاهَلْني لْتَحْقيق رغباتك

مَعَ انّك تْعَرْف ابوي وْخالي وْجَدّي

وانا بَعَدْ كل ما جا من حكاياتك

ما عاد عندي مجال آعيد لك عَدّي

هذي ملفّاتي وْهذي ملفّاتك

وباروح ما قِلْت مَيْد أوراقي اسوَدّي

صحيح أحبّك.. وعمري رَهْن لحظاتك

لكنْ تماديت في بنياني وْهَدّي

أنا انتهى وقتي وْذي كلمه وْجاتِك

والاّ انت لا صِرْت تبغي وقتك يْمِدّي؟؟

تعال.. يمديك تمحي كل زلاّتك

صحيح قفّيت لكن ما هو بْوِدّي

باوَقِّف شْوَيْ.. والْحَق كلّ ما فاتك

والاّ تراني نويت آروح من جدّي!