شعر: مساعد الشمراني

مرتاح ويَّاه.. فاهمني وفاهم له

أنا عجَبْته وهوّه حَيْل عاجِبْني

الحبّ قالوا عَذَاب وقلت لا باللّه

شوفوني اش لون أحبّه وما يعذَّبني

لو يطلبْ الشمس قِلْت المسأله سهله

يامِرْ حبيبي انا ما ابيه يطلِبْني

إن كان ما اتعب لعينه من هو أتعَبْ له

تَعَبْه راحه أبيه أكْثَرْ يتَعّبني

ما شِفْت زَيّه.. وَلا بالقى أبَدْ مثله

ياقَف بصفّي لو العَالَمْ تحاربني

يكفيني انّه يجيني بالغلا كِلّه

يكفيني انّه نسى رَبْعه وصاحَبْني

يطيح قلبي إذا ناظَرْ على غَفْله

إن فَتَّحْ آضيع وان غَمَّضْ يذوّبني

يا اللي تعاتِبْ خليلٍ ذاب في خِلّه

أراهِنِكْ لو تشوفه ما تعاتبني