شعر: راشد الذهلي

ذبذبات الفِكْر صوبك تتّجه يا نور عيني

مستديره من حنايا خافقي لك مرسله

كَنّ خطّ الوِدّ يْرسِم طيفك اللي يحتويني

ما نويت أعصي هوايه وْلا نويت أتْجاهله

والصدود اللي جحيمه ما تطفّيه السنينِ

غير وصلك يا غرامٍ في خفوقي حامله

آه يا حبٍ عطيته كل ما تملك يديني

جيت وِعْيوني مدينه ساكنٍ فيها الوَلَه

جيت والأيَّام تكتِبْ كل شيٍ صار فيني

لاجل تقرا .. لاجل تعرف وين حَلّ الأسئله

جيت لاجل آفِكّ طير الشوق واطفّي حنيني

واهجره مرسى الفراق اللي أسَرْني وازْعِله

آه.. لو كان الفراق إنسان تصطاده يميني

لانْحَرْ هْموم الأوادم واستبيحه واقتله