شعر: سعيد ذيب الحبابي

يا شِيْنها لا صار غالي ويجْرَحْك

ويا شينها لا صار خَصْمِك زمانِك

ويا شِيْنها الدمعه عقب بَسْمه وْضِحْك

وعقب الصفا وقتك غدَر بك وْخانِك

ويا شين جرحٍ تكتمه بَسْ يفضَحْك

كلٍ يشوفه مرتسم في عَيَانِك

ويا شينها لا صِرْت غامض وما اوضَحْك

وِيْبيح سَدٍ ما نِطَق به لسانِك

ويا زينها لا صار هالكون مَسْرَحْك

وتاِخذْ قضا قلبك من اللي أهانِك

وتطْرَح زمانٍ نِيّته دوم يطرَحْك

ينوي سقوطك.. وانت ثابِتْ مكانِك

ويا زين وقتٍ لا تشاءمت يفْرِحْك

ويْبدَّل أحزانك بضحكة ثمانِك

يا قلب ليتك تِنْتِصح لي وبانصَحْك

أبغي رفاعك ما رضيت بْطمانِك

يا كيف باشْرَحْ لك ويا كيف باشْرَحْك

وفيك الغموض اللي مأسِّسْ كيانِك

ما ادري أعذرِبْ فيك.. والاّ أبامْدَحْك

بس الوكاد انّي أبى عِزّ شانك