بو خلف ريال شيبة عمره 60 سنة، وعنده أحفاد اللي هم سيف 13 سنة في الصف الأول الإعدادي في مدرسة المهلب وشما 10 سنوات في الصف الرابع الابتدائي في مدرسة آمنة بنت وهب للبنات ورفيعة 7 سنوات في نفس مدرسة شما وهي في الصف الأول الابتدائي وعبدالله 5 سنوات بعده ياهل ما يسير المدرسة لأن هاذيج الأيام ماشي روضة.. بو خلف متعود يسولف على أحفاده اعيال ولده خلف عقب صلاة التراويح في شهر رمضان.. طبعاً نحن الحينة في عام 1973م.. بو خلف ساكن ويا ولده خلف في بيت عربي في منطقة الحمرية بدبي.. خلونا نسمع سوالف بو خلف ونشوف عن شو يخبر أحفاده
دخل شيبتنا بوخلف الميلس عقب صلاة التراويح ويا أحفاده الصغار.. ونش سواف يصب له قهوة.. اتقهوى بوخلف وهو يسولف ويلاعب حفيده الصغير عبدالله.. شاف شما مب طبيعية.. حزينة وويها مصفّر.. متضايقة ويالسه مويمه.
بوخلف: شما.. شبلاج أمايه؟
شما: سلامتك يدي.. ما فيني شي
بوخلف: شما.. شقايل ما فيج شي وانتي مويمه وويهج مصفر.. خبريني فديتج.. أنا يدج.. قولي لي شو فيج؟
شما وهي تطالع تحت ما تبا يدها يشوف الدموع اللي في عينها
شما: والله يا يدي أفكر في حمدة ربيعتي.. غامضتني وايد
بوخلف: منو حمدة فديتج؟.. وشبلاها؟
شما: حمدة يا يدي بنت يارنا بوصالح.. ظروفهم صعبة وايد.. ما فصلت لين اليوم ثياب حق العيد.. غمضتني وايد وهي تسمعنا اليوم في الصف نرمس عن ثيابنا اليديده وكل وحدة شو فصلت
بوخلف: هيه يا أمايه.. يزاج الله خير يوم تفكرين في غيرج.. طالعة على يدتج أم خلف الله يرحمها ويغمد روحها الجنة.. بس ما عليج أمايه.. أنا باجر عقب صلاة العصر بمر بيت بوصالح وبعطيه اللي فيه النصيب عشان يفرح عياله.. ولا تنسين فديتج إن عيال الحلال وايدين وما بيقصرون.. بيعطون بوصالح من الزكاة اللي يظهرونها لأنهم يعرفون ظروف بوصالح عقب ما انكسرت ريوله في الغوص والحينه ما فيه حيل يشتغل وكل مدخوله ومصروفه من الشونه (مساعدات
سواف: وشقايل بيتذكرونه يدي؟
بوخلف: يا وليدي يا سيف نحن في هذا الفريج كل واحد يعرف الثاني ويعرف ظروفه.. والتجار اللي في الفريج يعرفون الفقارا والمحتاجين اللي في الفريج وما يقصرون فيهم.. والمحتاج لازم نفزعه وما نخليه مهموم
شما: يدي.. يمكن هالسنه التجار ما يطلعون زكاتهم
بوخلف: لا أمايه.. التجار واللي عندهم واللي الله أنعم عليهم كل سنة يطلعون زكاتهم.. هذا فرض أمي
شما: يدي ولو ما طلعوا زكاتهم منو بيعرف؟.. محد بيعرف عنهم والفقارا محد بيعطيهم
بوخلف: يا بنتي الزكاة فرض والتجار يعرفون هذا الشي ولو الناس ما شافوهم يوم يطلعون زكاتهم ترى الله يشوفهم والفقارا لهم رب أسمه الرحمن الرحيم هو اللي يرعاهم ويتولاهم برحمته.. هيه يا شما.. ذكرتيني بسالفة استوت من سنين عن الزكاة واللي ما يطلعون زكاتهم وكيف ربج جازاهم على نواياهم الشينة.. واللي طلعوا الزكاة كيف رب العالمين عوضهم وزاد من أموالهم وبارك لهم فيها وعطاهم من نعايم الله الشي الكثير
سواف: يدي.. خبرنا عن السالفة.. نبا نسمع
بوخلف: إن شاء الله.. سمعوا هالسالفة
اعتدل بوخلف في يلسته وقال
بوخلف: من سنين بعيدة يا عيالي كان فيه تاجر أسمه علي وتاجر ثاني أسمه حمدان.. علي كان بخيل حتى على أهل بيته.. يوم يمر عليه الفقير دكانه ويقول له يا الله من مال الله يرد عليه ويقوله الله يعطيك أنا ما عندي شي.. أنا بروحي أبا حد يتصدق علي ويعطيني.. ويوم يحين وقت الزكاة ما كان يطلع زكاته.. كان يقول ما عندي شي أزكي عنه.. وكان ياره أسمه حمدان.. هذا بعد تاجر.. لكنه كريم وريال والنعم.. من يسمع عن حد محتاي سار له وعطاه.. ومن يسمع عن بيت توفى فيه رب الأسرة سار وقدم لهم مساعدة وعطاهم واتكفل فيهم.. يعطيهم ويصرف عليهم كل شهر.. ومن يسمع عن تاجر خسر في تجارته مر عليه وساعده عشان يرد ويوقف على ريوله مرة ثانية.. ومن يسمع عن حرمة أرملة وعندها أيتام نش وعطاها وأجزل في عطاياه وما يقصر عليها ولا على عيالها.. ومن ايي رمضان تشوفينه يجسم من الأكل اللذيذ على كل الفريج ويعطي الفقارا اللي يسدهم وزود.. ويتم على هالحاله لين آخر الشهر الفضيل.. وكان ميلسه مفتوح طول اليوم والكل يدخل ياكل ويشرب ويطلع.. غريب.. قريب.. بعيد.. عابر سبيل.. كله واحد عنده.. كان هالريال ونعم الرياييل ومن أكرم أهل زمانه
سكت بوخلف اشوي وخلا سواف يصب له قهوة.. تقهوى وكل فردة تمر ورد يكمل السالفة
بوخلف: هذا التاجر علي البخيل وسواياه.. والتاجر حمدان وأفعاله الزينه ومعانيه.. وكان حمدان دومه يمر على التاجر علي وينصحه ويقوله عليك بالزكاة ولا تشكي الفقر وقول الحمد لله.. إنت الله عاطنك من خيراته ولازم تفكر في الفقارا.. ولا تنسى إن الصدقة ترد البلا.. والزكاة تطهير للمال.. وكان التاجر علي يرد عليه ويقوله إنت متفيج.. لو أسوي شراتك والله بيطير اللي عندي في شهر.. ما فيها شي لو ما زكيت لأن محد محتاي.. شو الفايدة أزكي وأعطي وبيزاتي تخلص.. تباني يا حمدان أستوي شرات الفقارا اللي كل يوم يدقون باب بيتك ويمرون عليك الدكان يحشرونك عطنا من مال الله وعطنا من مال الله.. لا ما فيني.. المال عديل الروح.. لو ما حافظت عليه بكون بطران ولعاب ومسرف.. رد عليه حمدان وقاله الزكاة مب لعب ولا اسراف.. هذي فريضة يا أخوي يا علي.. لو عطيت وأجزلت في العطايا ربك بيبارك لك في أموالك وبيعطيك الزود.. شوفني أنا الله منعم علي ومن كل مكان إييني الخير.. شوف بيزاتي ما قصرت.. أشوفها تزيد يوم بعد يوم.. لكن التاجر علي ما كان يسمع نصيحة أخوه التاجر حمدان ولا يقتنع فيها
شما: يا الله.. خيبه.. أسميه بخيل
سواف: هيه والله أسميه بخيل
بوخلف: وفي يوم من الأيام يا عيالي.. مرت على التاجر علي حرمة يبين عليها الفقر والحاجة.. يلست عند باب دكانه من برع وقالت له عطنا من مال الله.. عصب عليها وقال لها ما عندي يالله لا تيلسين عند باب دكاني عن يتيمعون الفقارا.. قالت له عطني من مال الله يا تاجر علي والله بيعوضك أضعاف اللي بتعطيني إياه.. وأنا حرمة أرملة وعندي سبع أيتام يتريون لقمة العيش ياكلونها.. استوالنا يومين مب ذايقين الزاد.. ارحمنا الله يرحمك.. رد عليها وقال لها الله يعطيج.. سيري عند غيري دوري زكاة والا صدقة.. أنا ما عندي.. يالله نشي من عند باب دكاني بسرعة ولا اتين مرة ثانية.. قالت له الحرمة ما عليه يا تاجر علي أنا بنش لكن ربك بيبتليك ببلوة على الرمسة اللي قلتها لي.. كسرت بخاطر حرمة لا حول لها ولا قوة.. ما قلت لها لو كلمة حلوة تطيب خاطرها حتى لو ما عطيتها.. الله فوق يا تاجر علي الله فوق.. وسارت الحرمة عنه وهي رافعه إيديها للسما وتدعي
شما: حليلها والله.. غمضتني وايد
سواف: يعل الله يبليه ويفقره.. ما يخاف ربه
بوخلف: نشت الحرمة ومشت وهي تصيح ودموعها على خدها وسارت صوب دكان حمدان.. ويلست عند الباب.. من شافها قام من مكانه وسار صوبها وقال لها اقربي دخلي داخل لا تيلسين خاري.. قامت الحرمة ودخلت الدكان وهي تدعي له بالخير.. قال لها خبريني عن قصتج.. قالت له عطني من مال الله.. قال لها بعطيج أكيد وما بقصر من صوبج.. بس خبريني عن قصتج.. قالت له أنا حرمة أرملة وعندي سبع يهال صغار أبوهم توفى.. ونحن فقارا وما نملك غير رحمة ربنا فينا.. وعيالي استوالهم يومين مب ذايقين الزاد.. دمعت عين حمدان وهو يسمع الحرمة وكان يقول في قلبه الله يا الدنيا.. أنا في بيتي يالس آكل وأشرب ومرتاح.. وعيالي مب قاصرنهم شي.. وهذي الحرمة هي وعيالها مب ذايقين الزاد من يومين.. كان حمدان قلبه رقيق وطيب وكان يحب الفقارا وايد.. نش وسار صوب التجوري (الخزنة) وطلع منه بيزات وعطاها للحرمة وقال لها كل شهر مري علي إهنيه وخذي المقسوم وأي شي تحتاجينه والا يحتاجونه الصغارية تعالي وآمري وما يردج غير لسانج.. المال اللي عندي هذا أمانة ربة العالمين عندي.. هذا مال الله عطاني إياه ولازم أصرفه في الشي الصح عشان رب العالمين باجر بيحاسبني عليه.. مدت الحرمة إيديها وخذت المقسوم وتمت تدعي له بالخير وطول العمر وتدعي لعياله وإن الله يكثر من ماله ويعطيه الزود.. وسارت الحرمة عنه وهي رافعه إيدها للسما وتدعي له
شما: والنعم فيه والله حمدان.. صدق إنه كريم
بوخلف: هيه أمايه حمدان كريم والنعم فيه.. عشان جي عقبها بكم يوم.. نش الفريج كله نص الليل على حريجة في السوق كلت الخضر واليابس.. الحريجة هذي سلمكم الله يت على نص الدكاكين وكانت دكاكين التاجر علي من بينها.. كلت النيران كل شي في دكاكينه.. والشي الغريب إن دكاكين التاجر حمدان احذال دكاكين التاجر علي ولاصقه فيها لكن ما ياها شي أبد.. ويوم وصل التاجر علي شاف كل البضاعة اللي في دكاكينه احترقت وما تم منها شي.. وتم يدق على راسه ويقول آه يا مالي.. ضاع كل شي.. راح شقا عمري.. وين أسير ووين أضرب براسي.. آه على بيزاتي اللي تعبت عليها.. ضاع كل شي وراح خلاص.. يلست على حصير الفقر.. لكن التاجر حمدان كان قريب منه.. قاله ولا يهمك يا تاجر علي.. بيزاتي هي بيزاتك.. أنا بعطيك وبتفتح دكاكينك مرة ثانية.. الناس للناس يا أخوي
سواف: صدق إنه ريال.. والنعم فيه والله.. يعطي ويجزل العطايا حتى لواحد شرات التاجر علي البخيل اللي ما يخاف من ربه
بوخلف: هيه يا وليدي.. عشان جي التاجر علي نش وحب التاجر حمدان على راسه وقاله اسمح لي يا أخوي يا حمدان.. يوم تنصحني وما كنت آخذ بنصيحتك.. هذا كله ابتلاء من الله وعقاب لي لأني ما كنت أزكي ولا كنت أفكر في الفقارا.. ربك حب يراويني إشقايل الفقير يحزن ويفكر يوم يحس إن ما عنده شي.. لكن والله ومن هاللحظة أقول توبه.. خلاص تعلمت من الدرس.. بزكي وبتصدق وبعطي وما برد فقير.. والله بيعوضني.. ووجودك وياي يا أخوي يا حمدان علمني دروس في الحياة.. عسى يزيديك من عطاياه ويجزيك خير على اللي تسويه لي وللفقارا.. ومن يومها والتاجر علي تغير.. كان يتصدق ويزكي ويمر على البيوت المحتاجة ويعطي وما يقصر في حد.. حتى هل بيته غير معاملته لهم.. ما كان يقصر عليهم في شي.. والله زاد في تجارته وعطاه مال وحلال ما ينعد ولا يحصى.. كل هذا لأنه تصدق وزكى وما نسى المحتاجين
شما: الله يا يدي.. والله إن سوالفك حلوة وما تنمل.. وكل يوم نتعلم منك شي يديد الله يخليك لنا يدي
بوخلف: فديتج أمايه.. هذي قصص من الحياة أمي.. وكل يوم يمر علينا نتعلم منه شي يديد.. والحينه فديتكم خلوني أرتاح إشوي لين يحين وقت السحور
طلعوا العيال من الميلس عشان يخلون يدهم يرتاح إشوي ويتريون نهار ثاني عشان يسمعون سالفة يديده من سوالف يدهم بوخلف.