بو خلف ريال شيبة عمره 60 سنة، وعنده أحفاد اللي هم سيف 13 سنة في الصف الأول الإعدادي في مدرسة المهلب وشما 10 سنوات في الصف الرابع الابتدائي في مدرسة آمنة بنت وهب للبنات ورفيعة 7 سنوات في نفس مدرسة شما وهي في الصف الأول الابتدائي وعبدالله 5 سنوات بعده ياهل ما يسير المدرسة لأن هاذيج الأيام ماشي روضة.. بو خلف متعود يسولف على أحفاده اعيال ولده خلف عقب صلاة التراويح في شهر رمضان.. طبعاً نحن الحينة في عام 1973م.. بو خلف ساكن ويا ولده خلف في بيت عربي في منطقة الحمرية بدبي.. خلونا نسمع سوالف بو خلف ونشوف عن شو يخبر أحفاده
بو خلف و أحفاده يالسين في الميلس عقب صلاة التراويح يتغبقون و ياكلون من نعايم الله.. فريد و هريس و لقيمات و عصيدة بالبوبر و خبيص و فواكه و يشربون من اللبن الطيب و القهوة المقنده
سواف: يدي.. قرب رمضان يخلص
بو خلف: هيه يا وليدي.. رمضان شرات الضيف يمر علينا في السنة مرة.. ضيف خفيف.. ما حسينا فيه و الله.. مر بسرعة.. عسى الله يبلغنا إياه السنة اليايه.. الله أعلم عاد بيلس وياكم في الميلس و إلا بودع الدنيا و بكون عن ربكم الباري
شما: بسم الله عليك يدي الله يخلك لنا.. لا تقول جي يدي.. نحن نحبك وايد
بو خلف: فديتج أمايه هذا درب كلنا ماشينه.. محد دايم غير وجهه سبحانه
سواف: الله يخليك لنا يا يدي
بو خلف: العشر الأواخر يا عيالي أيام خير و بركة يحتاي المسلم يشتغلها في العبادة و قيام الليل
سواف: بس قيام الليل تعب يدي.. و نحن ورانا مدرسة الصبح اشقايل بنش للمدرسة؟
بو خلف: إنت عاد ما صدقت إن وراك مدرسة.. يا حبك للرقاد.. و اللي يسمعك يوم تقول مدرسة يقول عاد هذا ماشي شراته مقطع الكتب من المذاكرة و ينش من الغبشة.. مب جنك تنش القايلة و الباص دوم يسير عنك و تخلي أمك توصلك المدرسة مشي
سواف: إنزين يدي شو أسوي.. لازم أرقد عشان أنتبه للدروس و ما أرقد في الصف
بو خلف: و قيام الليل هو اللي ما بيخليك ترقد عدل يعني؟.. صدق إنك سفله و ما تعرف ترمس
سكت سيف يوم شاف يده معصب..
بو خلف: إنتوا ما تعرفون فضل قيام الليل.. و لا تعرفون شو فوايده.. قيام الليل عبادة و راحة علاج لنفس المومن.. أحيدني من و أنا عمري 9 سنوات كنت أسير ويا أبويه الله يحرمه و يغفر له المسيد و نحضرقيام الليل.. و كنت أرقد عقب قيام الليل لين وقت صلاة الفجر.. و أنش أسير المسيد وياه أصلي الفجر و نرد نرقد إشوي و عقب نسير الدكان.. ما كنت أحس بتعب و لا شياته.. و الله إني كنت مرتاح لأني أصلي ويا أبويه و أقوم الليل.. و كان أبويه يفتخر فيني جدام ربعه
سواف: بس يدي إنت ما كنت تسير المدرسة
بو خلف: هيه ما كنت أسير المدرسة لكني كنت أسير المطوع و أسير الدكان ويا أبويه.. يعني ما كنت أرقد للقايله.. مشكلتكم عيال هاليومين ما تعرفون تنظمون وقت رقادكم و وقت نشتكم
سواف: إنزين يدي أنا بسير وياك و ويا أبويه قيام الليل بس إشقايل بنش الصبح للمدرسة؟
بو خلف: إسمع يا وليدي الله يبارك فيك.. إنت من تخلص صلاة التراويح و تيلس إشوي قوم و سير إرقد.. و نش على قيام الليل.. و عقب رد و إرقد لين صلاة الفجر.. نش صل الفجر و رد إرقد.. بتنش الصبح بتحس بعمرك مرتاح و شبعان رقاد.. لكنك يوم تسهر وين تبا تصلي القيام بالله عليك.. شي أكيد ما بتروم تفج عيونك
سواف: يدي و الله محد من ربعي يسير قيام الليل
بو خلف: ما عليك من غيرك يا أبويه.. عليك من نفسك.. يعني لو غيرك ما صام إنت ما بتصوم؟.. لو غيرك ما صلى إنت ما بتصلي؟
سواف: لا يدي أكيد بصوم و بصلي
بو خلف: عيل خلاص.. ما يخصك في غيرك.. عليك من نفسك
سواف: يدي إنت يوم كنت صغير كانوا ربعك يسيرون قيام الليل
بو خلف: كل عيال الفريج كانوا يسيرون قيام الليل.. محد كان يتأخر لأن بنعايب عليه و بنقول عنه كافر.. اللي ما يصلي و إلا ما يسير صلاة التراويح و إلا قيام الليل كنا نقول عنه كافر و بانيان.. كنا نعايره و ما نرمسه.. ينجبر إنه يسير يصلي لأن محد بيرابعه..
كانت الصلاة عندنا أهم من اللعب.. و قيام الليل كنا نترياه.. نحن نظهر في الظلام قريب الفريج لأن هالشي يفرحنا.. و عقب نرد نتسحر و نرقد لين أذان الفجر.. نسير نصلي و نرد بيوتنا.. كانت حياتنا حلوة وايد.. كانت أيام ماشي أحلا عنها
شما: يدي.. البنات بعد كانن يسيرن قيام الليل؟
بو خلف: هيه أمايه يسيرن.. إنتي الحينه ما تسيرين ويا أمج صلاة التراويح؟
شما: هيه يدي أسير
بو خلف: إنزين قيام الليل نفس الشي.. لو سرتي بتشوفين بعد حريم و بنات يقيمن الليل في المسيد.. يا بنتي قيام الليل و الله راحة للنفس و القلب.. ليتكم تحسون بهذا الشي و تتلذذون بقيام الليل.. شو تبين بعد أكثر من رب العالمين يشوفج و إنتي تعبدينه و يفتخر فيج جدام الملائكة.. شو تبين أكثر من رضا رب العالمين يا بنيتي.. شو تبين أكثر من راحة القلب و الفواد
سواف: صدقك و الله يدي
و تم بو خلف ينصح أحفاه و يحثهم على قيام الليل لين ما حس إنهم فهموا معاني و فوائد قيام الليل
نشوا اليهال عن يدهم عشان يخلونه يرتاح إشوي على أمل الالتقاء فيه نهار ثاني عشان يسمعون منه سالفه يديده.