بو خلف ريال شيبة عمره 60 سنة، وعنده أحفاد اللي هم سيف 13 سنة في الصف الأول الإعدادي في مدرسة المهلب وشما 10 سنوات في الصف الرابع الابتدائي في مدرسة آمنة بنت وهب للبنات ورفيعة 7 سنوات في نفس مدرسة شما وهي في الصف الأول الابتدائي وعبدالله 5 سنوات بعده ياهل ما يسير المدرسة لأن هاذيج الأيام ماشي روضة.. بو خلف متعود يسولف على أحفاده اعيال ولده خلف عقب صلاة التراويح في شهر رمضان.. طبعاً نحن الحينة في عام 1973م.. بو خلف ساكن ويا ولده خلف في بيت عربي في منطقة الحمرية بدبي.. خلونا نسمع سوالف بو خلف ونشوف عن شو يخبر أحفاده
عقب صلاة التراويح.. بو خلف يالس ويا أحفاده في الميلس يسولفون وجدامهم وياكلون من خيرات الله
بو خلف وهو يتقهوى: الله يديمها نعمة ويحفظها من الزوال.
الجميع: آمين.
شما وهي تطالع يدها وأخوها سيف,
شما: يدي بخبرك عن سواف و سوالفه.
سواف: حوه.. ايه.. صخي.. ما يخصج فيني.. أنا حر.
بو خلف: صدق إن ما فيك مذهب.. حوه و صخي و ما يخصج فيني و أنا حر !.. وين يالسين نحن؟.. خل البنية ترمس واطلع فضايحك.. رمسي أمايه.
شما: يدي.. سواف ما يذاكر.. ونتايجه في المدرسة زفته.. ويوم عرفت قالي لو خبرتي أبويه و الا أمي والا يدي بضربج.
بو خلف: سواف؟.. يا جليل الحيا.. عنبوه استح على ويهك.. يعني بدال ما تاخذ بنصيحة اللي أكبر عنك وتسمع شورهم يمكن يشورون عليك بشور ويساعدونك يا الدعمة في دروسك ياي تهدد إختك.. مب كفو تمد إيديك عليها.. يالله هوش أشوف.
سواف: يدي.. مب جي يدي.. يدي أنا.. أوهو والله.. شموه ما عليه.. دواج عندي.
بو خلف: أول شي أسمها شما مب شموه.. غد ريال واصطلب.. ومب إنت اللي تروم تمد إيديك عليها.
سواف: يدي هاي فتانه.
بو خلف: لا مب فتانه.. إختك تدور على مصلحتك.. أخير من إنك تسود ويهك في نهاية السنة.. والحينه خبرني.. ليش ما تبا تدرس وتكتب؟.. شو قاصرنك؟.. غيرك اللي وياك في الصف أخير عنك في شو؟
سواف: يدي والله المدرسين ما يعرفون يدرسون.
بو خلف: جان سرت ودرست الفروخ بدالهم.. رمسة هي.
سواف: مب جي يدي.. بس والله ما نفهم عليهم.. عشان جي نتعاند وياهم وما نسوي واجباتنا.
بو خلف: شوف يا سواف.. إنت تعاند عمرك ما تعاند حد.. لو نجحت لعمرك ولو ما نجحت إنت اللي ما بتلاقي لقمة الخبز اللي تاكلها يوم بتكبر.. و إلا ناوي تستوي شرات ولد حروب؟
سواف: ولد حروب؟.. منو ولد حروب يدي؟
بو خلف: ولد حروب هذا سالفته سالفة.. وبسبة ثوارته وإنه ما إتعلم و لا إهتم يوم كان يسير عند المطوع خسر ما فوقه ودونه.
شما: خبرنا عن سالفته يدي.
بو خلف: سمعوا هالسالفة.. وأباك إنت يا سواف بالذات تتعلم هالدرس.
سواف: إن شاء الله يدي.
بو خلف: ولد حروب سلمكم الله هذا أسمه خميس و يزقرونه خماس.. أبوه كان تاجر وراعي حلال وأملاك ومب قاصرنه شي.. و الله ما عطاه غير هالولد اللي هو خماس و7 بنات.. وعشان هو ولده الوحيد وما عنده غيره وداه عند المطوع عشان يتعلم ويا عيال التجار.. يتعلم القراية والكتابة.. وكان أبوه كلما يتخبره عن دروسه يقول لأبوه الحمد لله تعلمت أقرا وأكتب.. وأبوه كان فرحان فيه ومستانس لأن ولده تعلم يقرا ويكتب.. ما سار أبوه يتخبر عنه المطوع ولا فكر إنه يعطيه يكتب له بروَّه (مكتوب) أو يقرا له شي من أوراقه.
سكت بو خلف إشوي وصب له فنيان قهوة ويلس يتقهوى.. وبعدين رد وكمل,
بوخلف: أبوه حروب سلمكم الله كان تاجر جشع وطماع.. وكان يسلف الناس وياخذ عنهم بدال الربية ربيتين.. وما كان يرحم حد.. و كل الفقارا مديننهم.. واللي ما يدفع ما يرحمه.. ياخذ بيته وإلا دكاكينه وإلا حلاله واللي موجود عنده.. و دعاوي الناس عليه وايده.. لين في يوم من الأيام شاف ولده كبر و قال بعتمد عليه..
وكانت أول سفرة بيودي ولده وياه فيها سفرته لبمبي.. جهز المحمل وتوكل على الله وشل وياه صندوقين فيهن أوراق.. واحد من الصناديق كانت فيه أوراق ملكية البيوت والدكاكين واللنجات والحلال والناس اللي دينهم.. والصندوق الثاني فيه أوراق مال حسابات البحرية اللي وياه ومعاشاتهم و يومياتهم.. توكل على الله ومشى المحمل يبا بمبي.. و عقب 4 أيام هبت عليهم شماله كسرت المركب.
سكت بو خلف إشوي,
سواف: كمل يدي.. شو استوى عقب؟
بو خلف: خلني أير نسمي إشوي.. بلاك مستعيل جي
سكت بو خلف و شرب له قلاص ماي.. و كمل السالفة
بو خلف: استوت فوضه في المحمل و كان فيه محمل صغير للنجاة يسد حق 4 أشخاص بس.. بو خماس حروب حس إن أجله قرب.. ما كان يروم يتحرك من مكانه.. عرف إن نهايته قربت.. زقر ولده بسرعة و قاله شل الصندوقين و اركب في المحمل الصغير و إهتم بالأوراق اللي في الصندوقين لأن فيها كل حلالنا.. خذ خماس الصندوقين و تم يركض ساير جدا المحمل الصغير.. إشوي و إلا المحمل الكبير يغرق و ما تم حد عليه.. ركب المحمل الصغير و كانوا فيه 5 و خماس سادسهم..
قالوا له اللي في المحمل لا تركب ويانا بيغرق المحمل و ما بيسد حق سته.. تم يترشاهم و يذكرهم إنه ولد راعي المحمل لين ما رحموه بس على شرط.. يعق واحد من الصندوقين بحر عشان ما يغرقون.. فكر خماس أي صندوق فيهم يعق.. هو ما يدري شو في الصندوقين.. اللي يعرف إنها أوراق مهمة أبوه وصاه عليها بس شو هي الأوراق ما كان يعرف.. لأنه ما يعرف يقرا.. تم يتصدد شرق و غرب و يمين و يسار.. سأل البحرية منو منكم يعرف يقرا عشان يقرا لي المكتوب في الأوراق..
ردوا عليه كلهم محد منا يعرف يقرا.. توهق خماس و قال خلاص دام جي بعق الصندوق اللي فيه أوراق إشويه لأنه أكيد الصندوق الكبير أهم عن الصندوق هذا اللي فيه أوراق أقل.. نش و عق الصندوق الصغير اللي فيه أوراق إشويه.. و مشى فيهم المحمل الصغير لين وصلوا للبر.. و هناك نزلوا و ارتاحوا يومين و عقب أجروا لهم محمل كان راد دبي و ردوا البلاد.
شما: كمل يدي.. شو استوى عقب؟
بو خلف: عقب سلمج الله.. سار خماس بيتهم و خبر أمه و خواته إن أبوهم غرق ويا المحمل.. و عقب ما خذوا عزا أبوهم.. يلسوا العايلة عشان يعرفون أبوهم شو خلالهم من حلال.. ياهم القاضي و دخل و سلم عليهم و قال لهم عطوني الأوراق اللي عندكم عشان تتجاسمون الحلال ما بينكم حسب الشريعة الاسلامية.. نش خماس و ياب الصندوق اللي عنده و فجه و عطى الأوراق اللي فيه للقاضي.. قال القاضي لخماس يا خميس هذي الأوراق ما يخصها بالأملاك و الحلال.. هاي أوراق حسابات البحرية و أجورهم اليومية اللي في ذمة أبوك و لازم تدفعونها عنه..
إهنيه خماس ما عرف شو يسوي و لا وين يدق براسه.. عرف إنه غلط غلطة كبيرة يوم عق الصندوق الصغير لأن فيه كل الأوراق الخاصة بحلالهم.. قال للقاضي ما شي غير هالأوراق.. قاله عيل لازم تدور لك على شهود يثبتون حلالكم و إلا كل شي بيروح عنكم.. و ظهر عنهم القاضي.
سواف: حليله خماس.. أسميه إتوهق.. إنزين يدي و بعدين شو صار؟
بو خلف: نش خماس و سار يدور له شهود يثبتون حلالهم لكن محد طاع يشهد وياه.. لأن أبوه كان ريال ظالم.. و الناس اللي دينهم أبوه فرحوا وايد باللي استوى لأنهم ما بيدفعون شي لأن ماشي اثبات إنهم ادينوا من حروب قبل ما يغرق.. و البحرية كل يوم تموا يدقون باب بيت قوم خماس يبون حقهم.. و التجار اللي كان حروب متعادي وياهم تفازعوا كلهم و تجاسموا دكاكين حروب و كل واحد طلع له شهود إن الدكاكين مرهونة له..
و النواخذه كل واحد منهم خذ له محمل من محامل حروب و عندهم الاثباتات لأن وايدين شهدوا وياهم.. و تم خماس و هله على حصير الفقر.. و السبه إن خماس ما عرف أي صندوق يعق في البحر.. عق الصندوق اللي فيه حلالهم و خلا عنده الصندوق الثاني.
سواف: بل بل بل.. كل هذا لا حشا ما فيني.. من اليوم ببدأ أقرا و أذاكر و أهتم من دروسي.. ما فيني أستوي شرات خماس.
بو خلف: بارك الله فيك ابويه.. العلم نور يا وليدي.. لازم تتعلم عشان تكون مفتح و واعي.. و الدولة مب مقصرة في شي.. تعلمكم ببلاش لين ما تكبرون.. احمدوا ربكم على النعمة.
الجميع: الحمد لله و الشكر على النعمة.
و إهنيه ظهروا الأولاد عن يدهم عشان يخلونه يرتاح لين وقت السحور.