بو خلف ريال شيبة عمره 60 سنة، وعنده أحفاد اللي هم سيف 13 سنة في الصف الأول الإعدادي في مدرسة المهلب وشما 10 سنوات في الصف الرابع الابتدائي في مدرسة آمنة بنت وهب للبنات ورفيعة 7 سنوات في نفس مدرسة شما وهي في الصف الأول الابتدائي وعبدالله 5 سنوات بعده ياهل ما يسير المدرسة لأن هاذيج الأيام ماشي روضة.. بو خلف متعود يسولف على أحفاده اعيال ولده خلف عقب صلاة التراويح في شهر رمضان.. طبعاً نحن الحينة في عام 1973م.. بو خلف ساكن ويا ولده خلف في بيت عربي في منطقة الحمرية بدبي.. خلونا نسمع سوالف بو خلف ونشوف عن شو يخبر أحفاده
عقب صلاة التراويح بوخلف يالس ويا شما ورفيعه يسولفون.. دخل عليهم عبدالله الصغير وهو يصيح لأن سواف ضاربنه.. دخل سواف وكان يبا يضرب عبدالله لكن عبدالله إندس ورا يده
بوخلف: سواف.. شو اتخبلت.. حاط عقلك ويا عقل ياهل؟
سواف: يدي خلني أأدبه الحمار هذا
بوخلف: والله محد حمار غيرك يا جليل الحيا.. عيل إنته بتأدبه؟.. وين سار أبوه؟.. وين أمه ويده؟.. إنته بروحك تبالك حد يأدبك
سواف: يدي.. عبود فج قفص الحمام وخلا الحمام كله يطير وما تمت ولا حمامة.. حرام والله يدي كل حمامي طار
بوخلف: وخير يا طير.. خله يطير.. من زين حمامك عاد.. مخيّس البيت
سواف: يدي.. حمامي أغلى حمام في الفريج.. والحينه ما تمت عندي ولا حمامة
بوخلف: أول شي لو كان حمامك أصيل بيرد.. لأن الحمامة الأصيلة ترد لراعيها.. ولو ما رد شو يعني.. أنا بسير وياك باجر السوق وبأشتري لك حمام من عند خموسه.. ولا تضرب أخوك الصغير.. عيب عليك تضرب ياهل وإنته كبر البغل
سواف: يدي حمامي هذا ما ينباع في السوق
بوخلف: هيه ما ينباع في السوق.. تراك يايبنه من جزر الواق الواق
إهنيه الكل ضحك على سالفة جزر الواق الواق
بوخلف: تحمل تضرب أخوك الصغير مرة ثانية وإلا بزوالك
سواف: شو هالحالة.. يطيّر حمامي وتبوني أتم ساكت.. إن شاء الله.. ما بضربه خلاص
بوخلف: إسمعني يا سيف.. الله عطاك القوة لا إتظهرها على واحد ضعيف.. ترى الله أقوى عنك.. وبيصيبك شرات ما صاب بوسالم
رفيعه: شو سالفة بوسالم يدي؟
بوخلف: صلوا على النبي
الكل: اللهم صلي وسلم عليه
بوخلف: أفلحتوا.. بوسالم سلمكم الله كان ريال الله عاطنه القوة.. ومن زود قوته ينضرب فيه المثل في الفريج.. يروم يرفع بقرة من قوته.. وفي البحر السمجة العوده اللي يتعاونون عليها 5 وإلا 6 رياييل عشان يسحبونها كان بوسالم بروحه يتولاها ويرفعها لظهر اللنج
شما: ماشاء الله عليه صدق إنه قوي
بوخلف: هيه نعم يا بنيتي كان ريال قوي.. والله عاطنه الصحة.. لكنه ما كان يرحم حد.. يضرب كل اللي جدامه بسبب وبدون سبب.. يمشي في السوق ويشوت هذا ويضرب هذا ولا عليه من حد.. كم مرة ودوه عند القاضي وحبسه وجلده لكنه ما يتوب.. كان شراني.. أحيد في يوم اتضارب ويا انجليزي.. الانجليزي مب هيّن بعد لكن بوسالم صرعه وعقه على الأرض وتم يدوسه في بطنه..
يوم نش الانجليزي جان يقول أول مرة في حياتي أنضرب.. طول عمري أضرب وأول مرة أنضرب.. وبوسالم ما صدق عمره وتم سنين يرمس عن هاي السالفة إنه ضرب ريال انجليزي وطلّع من خشمه الدم.. وبوسالم كان غيص معروف.. يوم يغوص يتم في القوع وقت طويل وربعه اللي وياه يظهرون إلا هو يتم.. كان عنده نسم طويل ولا حد يلحقه..
وكنا نحذره من اليرايير(سمك القرش) لكنه يقول: خل إييني يريور والله لأنتفه.. أنا بوسالم ما أخاف من شي.. كنا نقوله قوتك ما بدوم لك وكل قوي لابد إن الله يطرش له واحد أقوى عنه عشان يغلبه وإنته يا بوسالم شرات ما غلبت الانجليزي اللي طول عمره ما انغلب ترى الله بيطرش لك واحد أقوى عنك وإلا بيطرش لك آفه تغلبك.. ما كان يسمع الرمسة ولا يرد علينا.
سواف: خيبه اتخيبه.. شو يتحرا عمره هو؟
بوخلف: كان مغتر وايد بعمره يا ولدي.. كان يمشي رافع صدره ولا عليه من عباد الله.. والكل يدعي عليه ويقول الله يزلزلك يا بوسالم.. وفي يوم من الأيام كنا في وقت القفال (القفال يعني العودة للبلاد بعد الغياب عن الأهل في البحر ثلاثة أو أربعة شهور) وكان آخر يوم ومن عقبها بنقفل وبنرد البلاد.. غاصوا الغيص وتموا السيب (البحارة اللي يسحبون الغواصين بالحبل) يتريونهم.. وكنا مخلصين وكان بوسالم ويا الغيص.. كل الغيص ظهروا إلا بوسالم..
يظهر وفي إيديه الديين (هي عبارة عن سلة مصنوعة من الحبال أو القطن يحط فيها الغواص المحار) وياخذ السيب الديين ويرد مرة ثانية بوسالم يغوص.. يقوله النواخذا يالله يا بوسالم إنقفض وهو يرد على النوخذا ويقوله يا بوسليمان أنا فيني شده وأروم أغوص زود مب شرات الغيص ربعك اللي ما فيهم شده على البحر.. البحر يباله رياييل.. كان يرمس جي وهو في البحر ويضحك على الغيص اللي كانوا على ظهر المحمل.. ومرة وحدة سمعنا صرخة من بوسالم وظهر دم حوله..
تم السيب يسحب بوسالم وبوسالم يصرخ ويصرخ ويصرخ والدم يزيد وإلا نسمع النوخذا يصرخ سحبوه بسرعة يريور عض ريوله.. تعاونا كلنا عليه وسحبناه بسرعة ويوم وصل فوق وإلا ريوله من الورج مقصوصة والدم ينزل.. سرنا بسرعة ويبنا طحين وحطيناه على اليرح عشان نوقف الدم.. والحمد لله والشكر وقف الدم.. وكان بوسالم يصرخ ونحن مقفلين ورادين البلاد..
ويته حمه ثلاث ليالي لين ما وصلنا البلاد.. ريوله كانت مقصوصه وراحت هاييج القوة اللي فيه.. وتم بوسالم بلا ريول.. ومحد تم يشغله.. وفي الأخير تم يطلب عند المسايد والناس اللي كان يضربهم ويشوتهم ويسبهم تموا هم اللي يغلطون عليه ويطنزون عليه.. وندم بوسالم أشد الندم على كل اللي سواه في خلق الله وعرف إن الله شديد العقاب.. وتم بوسالم ملازم المسيد ما يخوز عنه لين ما ذكره ربه.
سواف: وابوييه.. لا ما فيني أضرب حد.. خلاص ما بضرب لا عبود ولا غير عبود.. ما فيني تنقص ريولي واستوي شرات بوسالم
بوخلف: يا بويه يا سيف الله يبارك فيك.. سالفة بوسالم خبرتكم عنها عشان أقولك إن الله عطاك القوة عشان تدافع بها عن الحق مب تعتدي بها على عباد الله.. أخوك عبدالله ياهل شو عرفه باللي سواه.. فج قفص الحمام وطارن الحمام.. يعني هو يدري إنهن بيطيرن.. لكن قدر الله وما شاء فعل.. وإنته تسير وتضربه وإطلع قوتك فيه.. مب زين يا بويه اللي سويته وما أباك تعتدي على حد لأن فيه اللي أقوى عنك اللي هو ربي وربك.
سواف: إن شاء الله يا يدي.. ما بعتدي على حد ولا يخصني في حد
وإهنيه ظهروا الأولاد عن يدهم عشان يخلونه يرتاح لين وقت السحور.